आधुनिक सेवासहितको अस्पताल सञ्चालन
पर्वत, ६ मङ्सिर । धुलिखेल अस्पताल काभ्रेको आर्थिक तथा प्राविधिक सहयोगमा यहाँको एक विकट गाउँमा आधुनिक सेवा सुविधासहितको अस्पताल सञ्चालनमा आएको छ ।
आर्थिक अभावमा स्वास्थ्य सेवाबाट वञ्चित दुर्गम गाउँका सर्वसाधारण जनतालाई सेवा दिने उद्देश्यले केन्द्रको स्थापना गरिएको हो । धेरै रकम खर्च गरेर पोखरा काठमाडौँ जान नसक्ने बिरामीलाई लक्षित गर्दै गाउँमै नियमित स्वास्थ्य जाँच, अल्ट्रासाउन्ड, इसिजी, माइनर र मेजर शल्यक्रियालगायतका सेवा दिने गरी अस्पताल सञ्चालनमा आएको हो ।
अस्पताल सञ्चालक समितिका संयोजक भोलानाथ शर्मा लम्सालका अनुसार – “अहिले सुरुवात मात्रै गरेका छौँ । केन्द्रको सबै व्यवस्थापन धुलिखेल अस्पतालले गर्ने बताइएको छ । अस्पतालमा अहिले आठ श्यया रहेका छन् ।”
केन्द्रबाट फलेवास क्षेत्रका खानीगाउँ, देवीस्थान, मुडिकुवा, शङ्खरपोखरी, ठानामौला, लिमिठाना, कुर्घाका साथै छिमेकी जिल्ला बागलुङका एक दर्जन गाविस लाभान्वित हुने लम्सालले बताउनुभयो । अस्पतालले स्थानीय जनतालाई सहज सेवा दिन न्यूनतम रु १० मा स्वास्थ्य जाँच गर्ने जनाइएको छ ।
केन्द्रको शनिबार एक कार्यक्रमका बीच जर्मन रोटरी भोलेन्टियर डा इभी जर्गवर्ग र धुलिखेल अस्पतालका प्रबन्ध निर्देशक डा राजेन्द्र कोजुले संयुक्त रुपमा उद्घाटन गर्नुभयो ।
कार्यक्रममा बोल्दै जर्मन भोलेन्टियर जर्गवर्गले दुर्गम गाउँमा रहेर स्वास्थ्य सेवाबाट वञ्चित बनेका समुदायलाई सेवा गर्ने उद्देश्यले स्वास्थ्य केन्द्रको भवन बनाउन सहयोग गरेको र यो सहयोग निरन्तर रहने बताउनुभयो ।
कार्यक्रममा धुलिखेल अस्पतालका प्रबन्ध निर्देशक कोजुले आफूहरुको सेवा दुर्गमसम्म पु¥याउने योजनाअनुरुप यस क्षेत्रमा केन्द्र सञ्चालन गरेको र केन्द्रलाई समुदायको माग र चापका आधारमा विस्तार गरिने बताउनुभयो । उहाँले यस केन्द्रबाट नियमित रुपमा स्वास्थ्य जाँच सेवा मासिक रुपमा विशेषज्ञ सेवा, आकस्मिक सेवा तथा फार्मेसी सेवाका साथै विभिन्न उपकरणमार्फत आधुनिक उपचार सेवा दिइने उल्लेख गर्नु भयो ।
कार्यक्रममा पर्वत क्षेत्र नं २ का सांसद विकास लम्सालले धुलिखेल अस्पतालले दुर्गम गाउँमा केन्द्र सञ्चालन गरेर आमसर्वसाधारणलाई सेवा दिने योजना बनाएकामा धन्यवाद ज्ञापन गर्नुभयो ।
फलेवासस्थित खानीगाउँमा विगत एक दशकदेखि सञ्चालनमा रहेको हेल्पिङ हेन्डस् सामुदायिक अस्पतालको सञ्चालनमा कठिनाइ भएपछि धुलिखेल अस्पताललाई जिम्मा दिइएको हो ।
सामुदायिक अस्पतालले समेत लामो समयदेखि स्थानीय गाउँका साथै आसपासका क्षेत्रमा रहेका बिरामीलाई सेवा दिँदै आएको थियो । सामुदायिक अस्पताल सञ्चालनमा कठिनाइ भएपछि धुलिखेल अस्पतालमार्फत नयाँ भवन बनाएर केन्द्र सञ्चालनमा ल्याइएको हो ।