काठमाडौँ, १९ फागुन । गृहमन्त्री शक्तिबहादुर बस्नेतले भूकम्पपछिको पुनःनिर्माणको काम निर्धारित समयमै पूरा गर्न सबैलाई सहयोग गर्न आग्रह गर्नुभएको छ ।

महिला, कानुन र विकास मञ्च, वियोङ बेइजिङ कमिटी, जागरण नेपाल, एड्भोकेसी मिडिया ग्रुपलगायतका संस्थाले आयोजना गरेको ‘लैङ्गिक उत्तरदायी विपद् व्यवस्थापन’ विषयक दुईदिने सम्मेलनको आज समापन गर्दै उहाँले सो कुरा बताउनुभएको हो ।

मन्त्री बस्नेतले पुनःनिर्माणको काम निर्धारित मितिमै सम्पन्न गर्नका लागि सरकार प्रतिबद्ध रहेको र सबैले आ–आफ्नो ठाउँबाट सहयोग गर्न आग्रह गर्नुभयो ।

“भूकम्प गएपश्चात् प्रारम्भिक चरणको काम पूरा भएको छ, अब पुनःनिर्माणको काम तोकिएको समयमै पूरा गर्न सबैको सहयोगको अपेक्षा गर्छु”– गृहमन्त्री बस्नेतले थप्नुभयो ।

उहाँले भूकम्पपीडितमा पनि सबैभन्दा बढी प्रभावितलाई सरकारले पहिलो प्राथमिकता दिएको र राहत, ऐन, नियम, प्राधिकरण गठनलगायतले गर्दा पुनःनिर्माणको काममा ढिलाइ भएको उल्लेख गर्नु भयो । रासस