धौवादीको फलामखानीको उत्खनन सरकार आफैँ गर्छ : मन्त्री पाण्डे
कावासोती, ४ वैशाख । नवलपरासीको धौवादी–३ पोखरीस्थित फलामखानीको उत्खनन सरकार आफैँले गर्ने उद्योग मन्त्री सोमप्रसाद पाण्डेले बताउनुभएको छ ।
खानी तथा भूगर्भ विभागको टोलीसहित शनिबार खानी क्षेत्र पुग्नुभएका मन्त्री पाण्डेले सरकार आफैँले फलामको उत्खनन गर्ने बताउनुभयो ।
मन्त्रालयले सम्भावना भएका खानी, पेट्रोलियम पदार्थको अन्वेशण गरिरहेको छ अब विकासको गति बढ्छ मन्त्री पाण्डेले भन्नुभयो – “धौवादीको फलाम खानी कुनै निजी क्षेत्रलाई दिइँदैन ।”
उत्खनन हुने बेलासम्म कामलाई निरन्तरता दिन्छौँ उहाँले भन्नुभयो – “पैसाका कारणले वर्षमा एक महिना काम गरेर रोक्ने काम हुँदैन, अन्तिम अवस्था नआउँदासम्म निरन्तर काम हुन्छ ।” पूर्वमा नाम्जाकोट पश्चिममा धौवादी र उत्तरमा ल्हापे र दक्षिणमा रुम्सीसम्म फलामखानीको क्षेत्र रहेको छ ।
विस्तृत अध्ययन टोलीले च्यानल सेम्पलिङ, टोपो जियोलोजिकल सर्वे, डिर्लिङलगायतको काम गरेकाले फलाम परीक्षणको काम भारत र चीन अथवा तेस्रो मुलुकमा गरिने मन्त्री पाण्डे जानकारी दिनुभयो ।
आगामी बजेटबाट सडक, खानेपानी र विद्यालयलाई सहयोग गर्ने कार्यक्रमसहित खानीको कामले तीव्रता पाउने उहाँले बताउनुभयो ।
दुई किमी क्षेत्रमा झन्डै चार करोड मेट्रिक टन फलाम रहेकाले सरकारले बाँकी आठ किमी क्षेत्रलाई पनि प्राथमिकता साथ काम गर्छ उहाँले बताउनुभयो । डेढ दुई वर्षभित्र यो खानी सञ्चालनमै ल्याउने तयारी मन्त्रालयले गरेको उहाँले दाबी गर्नुभयो ।
च्यानल सेम्पलिङमा ५८ प्रतिशतसम्म हेमटाइड वेर (फलाम निकाल्ने तत्व) भेटिएको टोली प्रमुख नरेश महर्जनले बताउनुभयो । ६० प्रतिशत हेमटाइड वेर उत्तम र ३० देखि ६० प्रतिशतसम्मको मध्यमखालको मानिन्छ ।
खानी क्षेत्रको पश्चिमपट्टिको भाग र उत्तरपट्टिको भागमा मन्त्री पाण्डेले अवलोकन गर्नुभएको थियो ।
विसं २०६७÷७८ देखि प्रारम्भिक सर्वे भएको यो ठाउँ सुरुमा कोइलाखानीका रुपमा अनुसन्धान गर्न आउँदा फलामखानी भएको पुष्टि भएको थियो । एक महिनादेखि पाँच जनाको भूगर्भविद्को टोलीले यस ठाउँको एक सय हेक्टर क्षेत्रफलमा विस्तृत सर्वेको काम गरेको थियो ।
टोलीले अध्ययनको काम सकेर करिब दुई टन नमूना लिएर काठमाडौँ जाने तयारी गरेको भूगर्भविद् नारायण बाँस्कोटाले बताउनुभयो ।
खानी तथा भूगर्भ विभागका निमित्त महानिर्देशक राजेन्द्रप्रसाद खनाल, उपमहानिर्देशक सोमनाथ सापकोटा, वरिष्ठ इन्जिनियर रुपक खड्का, भूगर्भविद् जनकबहादुर चन्दलगायतका टोली मन्त्री पाण्डेसँगै खानी क्षेत्र पुगेको थियो । रासस