कर्णालीका जलस्रोतलाई जनताको लगानीबाट उपयोग गर्न माग
काठमाडौँ, २५ भदौ । कर्णाली जनअधिकार मञ्चले कर्णालीका बाँझो भूमिलाई उत्पादनमा परिवर्तन गर्ने नीति ल्याउन माग गरेको छ ।
आज यहाँ आयोजित पत्रकार सम्मेलनमा मञ्चका अध्यक्ष प्रकाश रोकायले गत बिहीबार प्रधानमन्त्री पुष्पकमल दाहालले कर्णालीमा जन्मदा र मृत्यु हुँदा २० किलोग्राम चामल दिने भनी व्यवस्थापिका–संसद्मा गरेको घोषणाले कर्णालीवासी अपमानित र अपहेलित गरेको बताउनुभयो ।
सरकारसँग प्रष्ट नीति नभएका कारण कर्णाली सदियौँदेखि नै उपेक्षित भएकामा चिन्ता गर्दै कर्णालीका जनताले त्यस क्षेत्रका अपार प्राकृतिक स्रोत साधनको प्रचूर सम्भावना रहेको उहाँले बताउनुभयो ।
कार्यक्रममा मञ्चका महासचिव कमल शाहीले वर्षौंदेखि राज्यको नजरमा नपरेका कर्णाली क्षेत्रका नागरिकलाई गणतन्त्रमा बनेका सरकारले त्यहाँको विकास र परिवर्तनका लागि कार्य गर्नुपर्ने माग गर्नुभयो ।
देशको समग्र भूगोलको १५ प्रतिशत ओगटेको कर्णालीका जलस्रोतलाई जनताको लगानीबाट बहुउपयोगमार्फत विकसित र समृद्ध बनाउन माग गरिएको छ । रासस