वाग्मती सफाइ महाअभियानको २०० औँ हप्तामा नेपाल सफाइ सम्मेलन; उपत्यकाका प्रमुख नदीबाट ३२ मेट्रिक टन फोहर व्यवस्थापन
काठमाडौँ, २१ फागुन । वाग्मती सफाइ महाअभियानको २०० औँ हप्ताको पूर्वसन्ध्यामा नेपाल सफाइ सम्मेलन आयोजना गरिने भएको छ ।
विसं २०७० जेठ ४ गते शनिबारदेखि सुरु भएको वाग्मती सफाइ महाअभियान फागुन २८ गते शनिबार २०० औँ हप्तामा प्रवेश गर्दैछ । यस अवसरमा पशुपति क्षेत्र विकास कोषको आयोजना र सहरी विकास एवम् सङ्घीय मामिला तथा स्थानीय विकास मन्त्रालयको सहयोगमा फागुन २७ गते शुक्रबार सफाइ सम्मेलन गरिने सफाइ महाअभियानले जनाएको छ ।
सफाइमा कोषका सदस्य सचिव डा गोविन्द टण्डनले ‘पानी र वाग्मतीको धार्मिक सांस्कृतिक महत्व’, प्रधानमन्त्री तथा मन्त्रिपरिषद्को कार्यालयका सचिव दीनेश थपलियाले ‘वाग्मती सफाइमा नेपाल सरकारले लिएको स्वामित्व’ र गायत्री परिवारका डा राजु अधिकारीले ‘वाग्मती सफाइको सुरुआत, निरन्तरता र भविष्य’ विषयमा कार्यपत्र प्रस्तुत गर्नुहुनेछ ।
कार्यपत्रमाथि वाग्मतीको विषयमा अध्ययन अनुसन्धान गरिरहनुभएका अमेरिकी नागरिक विलियम थोब्स र पूर्वसचिव किशोर थापाले टिप्पणी गर्नुहुने कार्यक्रम रहेको कोषका सदस्य सचिव टण्डनले जानकारी दिनुभयो । सम्मेलनमा देशभर सञ्चालन भइरहेको नदी सफाइ अभियानका ५०० अभियन्ताको सहभागिता रहनेछ । सम्मेलन पशुपति क्षेत्रस्थित माधवराज सुमार्गी भवनमा आयोजना गरिनेछ ।
फागुन २६ गते वाग्मतीसम्बन्धी कवि सम्मेलन गरिनेछ । सम्मेलनमा राष्ट्रकवि माधवप्रसाद घिमिरे र संस्कृतिविद् सत्यमोहन जोशीको समेत उपस्थिति हुने सफाइ अभियन्ता उमेश बोहराले जानकारी दिनुभयो ।
सफाइ महाअभियानको २०० औँ हप्ताका अवसरमा फागुन २८ गते शनिबार सुन्दरीजलदेखि चोभारसम्मका १८ स्थानमा विशेष कार्यक्रम गर्ने निर्णय आज बसेको सफाइ महाअभियानको बैठकले गरेको छ । उपत्यकाका २५ स्थानमा सफाइ महाअभियान सुरु भएको २०० औँ हप्ताको स्वागतका लागि द्वार र सहभागी बन्न उपत्यकावासीमा आह्वान गरिएको तुल राखिने भएको छ ।
सफाइ महाअभियानको मूल कार्यक्रम शङ्खमुलमा गरिने सफाइ महाअभियानले जनाएको छ । विसं २०७० जेठ ४ गतेदेखि आजसम्म वाग्मतीबाट छ हजार ५०० मेट्रिकटन फोहर व्यवस्थापन गरिएको छ । वाग्मतीका सहायक नदीबाट समेत गरी आठ हजार मेट्रिकटन फोहर निकालिएको छ । हालसम्म पाँच लाखभन्दा बढीले वाग्मती सफाइमा सहभागिता जनाएको महाअभियानका अभियन्ता बोहराले बताउनुभयो ।
उपत्यकाका प्रमुख नदीबाट ३२ मेट्रिक टन फोहर व्यवस्थापन
यसैबिच, उपत्यकाका प्रमुख नदी सफाइ गरी ३२ मेट्रिक टन फोहर व्यवस्थापन गरिएको छ ।
बागमती सफाइ महाअभियानको १९९औँ हप्तामा आज कोटेश्वर महादेव मन्दिरदेखि मनोहरा नदी दोभानसम्म सफाइ गरी १६ मेट्रिक टन फोहर व्यवस्थापन गरिएको अभियानकर्मी उमेश बोहराले जानकारी दिनुभयो ।
सफाइमा अधिकारसम्पन्न बागमती सभ्यता एकीकृत विकास समिति, काठमाडौँ महानगरपालिका, नेपाली सेना, नेपाल प्रहरी, सशस्त्र प्रहरीलगायत संस्थाका गरी सात सय व्यक्तिको सहभागिता थियो । सफाइको नेतृत्व चीनका लागि नेपाली राजदूत एवम् पूर्वमुख्य सचिव लीलामणि पौडेलले गर्नुभएको थियो ।
सफाइमा पूर्वसचिव किशोर थापा, चीनका लागि पूर्वनेपाली राजदूत डा महेश मास्के, अधिकारसम्पन्न बागमती समितिका सञ्चालक समिति सदस्यहरु, गायत्री परिवारका डा राजु अधिकारी, एस ट्राभल्सका अर्जुन धरेललगायत अभियन्ताको सहभागिता थियो ।
फागुन २८ गते शनिबार बागमती सफाइको २००औँ हप्तालाई विशेष कार्यक्रमका रुपमा गर्ने तयारी गरिएको छ । विशेष कार्यक्रमको मूल समारोह शङ्खमूलमा गरिनेछ ।
बागमती सफाइ महाअभियानको २००औँ हप्ताको तयारीका लागि मुख्य सचिव डा सोमलाल सुवेदीको संयोजकत्वमा सरकारका सचिव र बागमती सफाइ महाअभियानका अभियन्ता सहभागी रहेको समिति गठन गरिएको छ । यस अवसरमा शङ्खमूलसम्मको बागमतीलाई ढलमुक्त गरी स्नानयोग्य भएको घोषणा गरिँदैछ ।
रुद्रमती सफाइको १५८औँ हप्तामा आज देवीनगर पुलदेखि बिजुलीबजार पुलसम्मको क्षेत्रमा सफाइ गरी तीन मेट्रिक टन फोहर व्यवस्थापन गरिएको रुद्रमती सरोकार समाजका उपाध्यक्ष रोहित गिरिले जानकारी दिनुभयो । सफाइमा काठमाडौँ महानगरपालिका–४, ५, ७, ९ र ३३ कार्यालयका कर्मचारी, स्थानीयवासी, वडा नागरिक मञ्चका पदाधिकारी, वातावरण संरक्षण अभियान लगायतको सहभागिता थियो । सफाइको नेतृत्व पूर्वप्रहरी अतिरिक्त महानिरीक्षक विज्ञानराज शर्माले गर्नुभएको थियो ।
विष्णुमती सफाइको १३१औँ हप्तामा आज तारकेश्वर र टोखा नगरपालिकाको सीमास्थित मनोहर तीर्थमा सफाइ गरी १३ मेट्रिक टन फोहर व्यवस्थापन गरिएको अभियानकर्मी अनिल धरेलले बताउनुभयो । सफाइमा तारकेश्वर नगरपालिका, टोखा नगरपालिका लगायतका गरी पाँच सय जनाको सहभागिता थियो ।
यसैगरी गुह्येश्वरी माथिको बागमती नदीमा राम्रो जोरपाटी हाम्रो जोरपाटी र पुडासैनी मैत्री समाजलगायत संस्थाले सफाइ गरेका छन् । विसं २०७० जेठ ४ गते शनिबारदेखि बागमती सफाइ महाअभियान सुरु भएको थियो । बागमती सफाइ महाअभियान सुरु भएपछि अन्य सहायक नदी र उपत्यका बाहिरका नदी सफाइ गर्नसमेत स्थानीयवासी जुटेका छन् ।
यही फागुन २८ गते शनिबार सफाइको २००औँ हप्तामा गरिने विशेष कार्यक्रममा प्रधानमन्त्री, प्रधानन्यायधीश, सभामुखलगायत सबै प्रमुख दलका शीर्ष नेताको सहभागी हुने महाअभियानले जनाएको छ । रासस