ट्राफिक प्रहरीको दुर्घटनारहित होली अभियान; होलीमा उच्छृङ्खल गतिविधि गर्ने दुई सय पक्राउ
काठमाडौँ, २९ फागुन । होली पर्वका बेला काठमाडौँ उपत्यकामा सवारी दुर्घटना हुन नदिने उद्देश्यले महानगरीय ट्राफिक प्रहरी महाशाखाले आज बिहानैदेखि सञ्चालन गरेको दुर्घटनारहित होली अभियान प्रभावकारी भएको छ ।
अपराह्न ४ बजेसम्म काठमाडौँ, ललितपुर र भक्तपुरका कुनै सडकमा गम्भीर दुर्घटना भएको छैन भने नाका–नाकामा गरिएको सुरक्षा जाँचले सबै किसिमका सवारी साधनका चालकलाई सचेत गराएको छ ।
अभियानका क्रममा ९३३ जनालाई महाशाखाले कारबाहीको दायरामा ल्याएको, ६७३ जना मादक पदार्थ सेवन गरेर सवारी साधन चलाएका र क्षमताभन्दा बढी भार राखेर बाहन हाँक्ने ९६ जनाका कागतपत्र खिचिएको बताएको छ ।
कारबाहीमा परेका अधिकांश दुईपाङ्ग्रे सवारी साधनका चालक रहेका, केहीले सवारी चालक अनुमतिपत्र साथमा नराखेका तथा आवश्यक सुरक्षा उपाय नअपनाई सवारी हाँकेको पाइएको महाशाखाले जनाएको छ ।
साँझ अबेरसम्म अझ सशक्त रुपमा सुरक्षा जाँच गरिने बताउँदै महाशाखाले सबैलाई दुर्घटनारहित ढङ्गले होली मनाउन आग्रह गरेको छ ।
होलीमा उच्छृङ्खल गतिविधि गर्ने दुई सय पक्राउ
महानगरीय प्रहरी परिसरले होलीका अवसरमा उच्छृङ्खल गतिविधि गर्दै हिँड्ने २१३ जनालाई पक्राउ गरेको छ ।
परिसरबाट खटिएको टोलीले आज उपत्यकाका विभिन्न स्थानमा उच्छृङ्खल गर्दै हिँडेका उनीहरुलाई पक्राउ गरिएको परिसरका प्रवक्ता एवम् प्रहरी उपरीक्षक प्रद्युम्नकुमार कार्कीले जानकारी दिनुभयो । उहाँले घटनाका दोषीको छानविन भइरहेको र दोषीलाई कडाभन्दा कडा कारबाही गरिने बताउनुभयो । रासस