विश्व बैंकले पुनःनिर्माणमा सहयोग बढाउने
काठमाडौँ, ३० फागुन । विश्व बैंकले नेपालमा भूकम्पपछिको पुनःनिर्माणका लागि थप सहयोग गर्ने घोषणा गरेको छ ।
विश्व बैंकका कार्यकारी निर्देशक एन्डिन हडियान्तोले ग्रामीण क्षेत्रमा प्राविधिक जनशक्तिको अभाव, पुनःनिर्माणपछि जनताको जीविकोपार्जन तथा आर्थिक समृद्धिमा सीप विकास र क्षमता बिस्तार गर्ने प्रतिबद्धता व्यक्त गर्नुभयो ।
नेपालका भ्रमणमा रहनुभएका हडियान्तोले राष्ट्रिय पुनःनिर्माण प्राधिकरणका प्रमुख कार्यकारी अधिकृत डा गोविन्दराज पोखरेलसँगको छलफलपछि भूकम्पपछिको पुनःनिर्माणमा भइरहेको सहयोगलाई थप प्रभावकारी बनाउने बताउनुभयो ।
उहाँले पुनःनिर्माणमा देखिएका चुनौतीबारे जिज्ञासा राख्दै विश्व बैंकको सहयोगमा सञ्चालित विभिन्न परियोजनालाई सफल बनाउन सरकारी संयन्त्रबीच थप समन्वय र सहकार्य आवश्यक रहेकोमा जोड दिनुभयो ।
प्राधिकरणका प्रमुख कार्यकारी अधिकृत डा पोखरेलले पुनःनिर्माणमा देखिएका चुनौतीलाई सामना गर्न विकास साझेदार संस्थाको महत्वपूर्ण भूमिका हुने बताउँदै भूकम्पले भत्किएका निजी आवास, शैक्षिक संस्था र स्वास्थ्य सेवासँग सम्बन्धित संरचनालाई प्राथमिकता दिएर काम गरिरहेको जानकारी गराउनुभयो । रासस