वित्तीय विस्तारका लागि बैंकिङ एक्स्पो
काठमाडौँ, वैशाख १५ गते । वित्तीय रुपमा पछि परेका समुदायलाई लक्षित गरी भृकुटीमण्डमा ‘बैंकिङ एक्स्पो–२०१७’ आजदेखि सुरु भएको छ ।
नेपाल राष्ट्र बैंकका गभर्नर डा चिरञ्जीवी नेपालले एक्स्पोको उद्घाटन गर्नुभयो । काठमाडौँ उपत्यकामा पनि बैंकिङ प्रणालीमा नआएका लाखाँै नागरिक रहेकाले एक्स्पोको आयोजना गरिएको हो । एक्स्पोको महत्वबारे गभर्नर डा नेपालले भन्नुभयो – “वित्तीय साक्षरता प्रदान गर्ने महत्वपूर्ण अभियान हो । यसलाई निरन्तर विस्तार गर्दै लैजानुपर्छ ।”
हिमालय बैंक कार्ड विभागका अधिकृत सूर्योदय प्रजापतिले बैंक तथा वित्तीय संस्थाले उपलब्ध गराएका ‘स्किम’को जानकारी दिने उपयुक्त स्थल एक्स्पो भएको बताउनुभयो ।
युवा तथा साना व्यवसायी स्वरोजगार कोषमार्फत सरकारले ल्याएका कार्यक्रम तथा धितोपत्र बोर्डअन्तर्गत हुने सबै पुँजी बजारका क्रियाकलाप, नेपाल राष्ट्र बैंकका गतिविधिबारे एक्स्पोमा जानकारी पाउन सकिनेछ ।
राष्ट्र बैंकबारे जानकारी दिन बस्नुभएकी अधिकृत निभा श्रेष्ठले एक्स्पोको प्रवद्र्धक केन्द्रीय बैंक भएको जानकारी दिनुभयो । एक्स्पोमा सरकारबाट इजाजत प्राप्त ‘क’, ‘ख’, ‘ग’ र ‘घ’ वर्गका बैंक तथा वित्तीय संस्था, बिमा समितिबाट इजाजत प्राप्त सबै बिमा कम्पनीको सहभागिता रहेको छ । नियमन निकाय एवम् सेवाप्रदायक र सेवाग्राही एकै छानामुनि ल्याउने काम भएको एक्स्पो संयोजक माधव निर्दोषको भनाइ थियो ।
तीन दिनसम्म चल्ने एक्स्पोमा ४५ वटा प्रदर्शनी कक्ष रहेका छन् भने पाँच लाख अवलोकनकर्ता आउने विश्वास लिइएको छ । एक्स्पोमा अवलोकन गरेर बाहिर निस्कँदै गरेका दिपेश दाहालले वित्तीय पहुँचमा नभएका नागरिक एवम् बैंक तथा वित्तीय संस्था, बिमा र पुँजी बजारबारे जानकारी लिन सकिने भएकाले महत्वपूर्ण कार्य भएको प्रतिक्रिया दिनुभयो ।
ग्लोबल आइएमई बैंकको कर्जा विभागमा काम गर्दै आएका धीरेन्द्र चन्दले आफ्ना स्किम तथा सेवाबारे प्रचार गर्ने उपयुक्त थलो एक्स्पो भएको बताउनुभयो । यस एक्स्पोमा प्रतिस्पर्धी संस्थाको सहभागी भएकाले एकले अर्काको प्रवद्र्धनात्मक तरिका थाहा पाउन सहज हुने विश्वास लिइएको छ ।
एक्स्पोपमा विप्रेषण तथा लघुवित्त संस्थाले पनि आफ्ना अभियानका विषयमा जानकारी दिनेछन् । “बैंक तथा वित्तीय संस्था एकीकृत रुपमा घरजग्गा, गाडीमा मात्र कर्जा प्रवाह गर्दारहेछन्, सेवामा बैंक तथा वित्तीय संस्थाको विविधता रहेनछ” – अवलोकनकर्ता दीपेशले भन्नुभयो ।
सेवाग्राहीको आकाङ्क्षाअनुसार बैंक तथा वित्तीय संस्थाले आफ्ना सेवालाई विविधीकरण गरेका खण्डमा वित्तीय पहुँच विस्तार हुने र नयाँ सेवाग्राही थपिन्छन् भन्ने सेवाप्रदायकले विश्वास गर्नुपर्छ । रासस