हिउँदको विद्युत व्यवस्थापनका लागि भारतबाट थप ५ मेगावाट विद्युत ल्याइने
काठमाडौँ, कात्तिक १० गते । नेपाल विद्युत प्राधिकरणले आगामी हिउँदको विद्युत माग व्यवस्थापनका लागि टनकपुर नाकाबाट थप पाँच मेगावाट विद्युत आयात गर्ने भएको छ । सोसम्बन्धी सम्झौतामा भारतको नयाँ दिल्लीमा आज भएको द्विपक्षीय सम्झौतामा प्राधिकरणका कार्यकारी निर्देशक कुलमान घिसिङ र भारतका तर्फबाट अरुणकुमार गार्गले हस्ताक्षर गर्नुभएको छ ।
गत वर्ष सोही नाकाबाट प्राधिकरणले ३५ मेगावाट विद्युत् आयात गरेको थियो । प्राधिकरणका प्रवक्ता प्रबल अधिकारीका अनुसार आज भएको सम्झौता यही कात्तिक १५ गतेबाट लागू भई आगामी जेठमा सकिनेछ ।
यो पुरानै सम्झौताको नवीकरण भएको भन्दै उहाँले सम्झौताअनुसार प्राधिकरणले पिटिसीसँग प्रतियुनिट भारु ३ रुपैयाँ ४४ पैसामा विद्युत खरिद हुने जानकारी दिनुभयो । टनकपुर नाकाबाट ४० मेगावाटसम्म विद्युत आयात हुँदा सुक्खा याममा सुदूरपश्चिमको माग व्यवस्थापन गर्न सहज हुने प्राधिकरणले जनाएको छ ।