सरकारले तोक्यो अस्थायी प्रादेशिक राजधानी र प्रदेश प्रमुख (सूचीसहित); अस्थायी राजधानी तोक्नेवित्तिकै दाङ र धनकुटामा आन्दोलन सुरु
काठमाडौं, माघ ३ । लामो अलमलपछि सरकारले अन्ततः सातवटै प्रदेशको अस्थायी मुकाम तोकेको छ । बुधबार दिउँसो बसेको मन्त्रिपरिषद बैठकले प्रदेशहरुको अस्थायी मुकाम तोकेको कानुनमन्त्री यज्ञबहादुर थापाले जानकारी दिए ।
बुधबार दुई पटक बैठक बसेको थियो । पहिलो बैठकमा केही प्रदेशको राजधानीलाई लिएर मन्त्रीहरुबीच विवाद भएपछि दिउँसो दोस्रो बैठक बसेको थियो, जसले प्रदेशका अस्थायी मुकामहरु तोकेको छ ।
जस अनुसार प्रदेश १ को विराटनगर, २ को जनकपुर, ३ को हेटौंडा, ४ को पोखरा, ५ को रुपन्देही, ६ को सुर्खेत र ७ को धनगढी अस्थायी मुकाम तोकिएको छ ।
प्रदेश ६ र ४ बाहेक अन्यको राजधानीलाई लिएर आन्दोलन भइरहेको छ । धनकुटालाई प्रदेश १ को राजधानी बनाउनु पर्ने माग भइरहेको छ भने २ को राजधानी वीरगञ्ज हुनु पर्ने भन्दै प्रदर्शन भइरहेको छ ।
प्रदेश ७ को राजधानी धनगढी तोकिएपछि डोटी आन्दोलित भएको छ । दिपालयलाई मुकाम तोक्नु पर्ने माग राख्ै आन्दोलन नै भयो भने डडेलधुरा लगायतका जिल्लामा पहाडी जिल्लामा राजधानी हुनु पर्ने माग पनि उठेको थियो ।
संविधान अनुसार प्रदेशको नाम र राजधानी तोक्ने अधिकार प्रदेशसभाको हो र दुई तिहाईले निर्णय गर्नुपर्छ ।
त्यस्तै, सरकारले प्रदेश प्रमुखको पनि टुंगो लगाएको छ ।
यि हुन् प्रदेश प्रमुख बन्नेहरु :
प्रदेश १ गोविन्द सुब्बा
प्रदेश २ रत्नेश्वर लाल कायस्थ
प्रदेश ३ अनुराधा कोइराला
प्रदेश ४ बाबुराम कुँवर
प्रदेश ५ उमाकान्त झा
प्रदेश ६ दुर्गाकेशर खनाल
प्रदेश ७ मोहनराज मल्ल
अस्थायी राजधानी तोक्नेवित्तिकै दाङ र धनकुटामा आन्दोलन सुरु
बुधबार अपरान्ह बसेको मन्त्रिपरिषद्को बैठकले सातवटा प्रदेशका अस्थायी केन्द्र तोकेपछि त्यसको विरोधमा प्रदर्शन भएका छन् । सरकारको उक्त निर्णयको विरोधमा धनकुटामा प्रदर्शनसहित क्षेत्रीय प्रशासकसहित प्रधानमन्त्री शेरबहादुर देउवाको पुत्ला दहन भएको छ ।
अस्थायी राजधानी आन्दोलन परिचालन समितिका संयोजक सुन्दरबाबु श्रेष्ठका अनुसार सरकारले धनकुटेली जनताको भावना र यसअघि नेताहरुको प्रतिबद्धताविपरित सदरमुकाम तोकिएकाले आन्दोलन थप शसक्त बनाउने बताए ।
सरकारले प्रदेश नंम्बर १ को अस्थायी राजधानी विराटनगरलाई तोकेपछि धनकुटाबासी थप आक्रोशित बनेका हुन् । उनीहरुले प्रदेश नम्बर १ को राजधानी धनकुटा बनाउनुपर्ने माग गर्दै विगत लामो समयदेखि आन्दोलन गर्दै आएका थिए ।
यता,त्यसैगरी प्रदेश नम्बर ५ को राजधानी रुपन्देहीलाई तोकेपछि दाङमा पनि विरोध भएको छ । प्रादेशिक राजधानी सरोकार समितिको बुधबार बसेको बैठकले सरकारको उक्त निर्णयको विरोध गर्दै माघ ३ लाई कालो दिवसका रुपमा मनाउने निर्णय गरेको छ ।
त्यस्तै बैठकले सरकारको निर्णय विभोदपुर्ण भन्दै अनिश्चितकालिन आमहड्ताल गर्ने तथा सरकारी कामकाज ठप्प पार्ने निर्णय गरेको समितिका सदस्यसचिव सविन प्रियासनले बताए ।