औद्योगिक ग्राम नबन्दा उद्योगी हैरान
ललितपुर, चैत ११ गते । ‘औद्योगिक ग्राम’ नबन्दा लुभू र बाँडेगाउँका कपडा व्यवसायीलाई व्यवसाय चलाउन कठिन भएको छ ।
लुभू र बाँडेगाउँमा धेरै व्यवसायीले कपडा उत्पादन गर्दै आएका छन् । बाक्लो बस्तीमा उद्योग सञ्चालन हुँदै आएको ललितपुर उद्योग वाणिज्य संघ, क्षेत्र नं २ का अध्यक्ष जुजुकाजी महर्जनले बताउनुभयो । बस्तीमा कुनै पनि व्यक्तिले उजुरी गर्नासाथ उद्योग बन्द हुने अवस्था छ । उहाँ भन्नुहुन्छ, “औद्योगिक ग्राम शुरु भएमा हामी व्यवसायीले पनि निर्धक्क भएर उद्योग सञ्चालन गर्न पाउँथ्यौँ र अरुलाई पनि बाधा पुग्दैन ।” उद्योगले ध्वनि प्रदूषण गर्ने हुँदा छिमेकीको गुनासो बढदै आएकोे छ ।
घरेलु तथा साना उद्योग कार्यालयबाट उद्योग दर्ता हुँदा चारजना छिमेकीको सिफारिस चाहिन्छ । तीमध्ये एकजनाले उजुरी गर्नासाथ उद्योग बन्द हुन्छ । उहाँ भन्नुहुन्छ, “आजसम्म चलिरहेको उद्योग कतै भोलि बन्द हुने हो कि भन्ने चिन्तामा हामी छौँ ।” छिमेकीले उजुरी गर्दा केही उद्योग बन्दसमेत भएका छन् ।
यस ठाउँको कपडा व्यवसाय यहाँको जीविकोपार्जनमात्रै नभएर संस्कृतिसँग पनि जोडिएको छ । यहाँका अधिकांश व्यवसायीको यो पुख्र्यौली पेशा हो । लुभू र बाँडेगाउँमा गरेर झण्डै १८० जना व्यवसायी कपडा उद्योगमा संलग्न छन् । रासस