डेँगू नियन्त्रणमा सरकार सचेत छःमन्त्री बाँस्काेटा; विज्ञापनलाई नियमन गर्न नयाँ इतिहास कोरिएको छ
काठमाडौँ, भदौ २६ गते । सञ्चार तथा सूचना प्रविधि मन्त्री गोकुलप्रसाद बाँस्कोटाले नागरिकको स्वास्थ्यका विषयमा सरकार संवेदनशील रहेको बताउनुभएको छ । सरकारका प्रवक्ता बाँस्कोटाले मुलुकका विभिन्न भागमा फैलिएको डेँगू नियन्त्रणमा सरकार सचेत रहेको र स्वास्थ्य मन्त्रालयले यसमा गम्भीरतापूर्वक काम गरिरहेको बताउनुभयो ।
उहाँले भदौ २२ गते बसेको मन्त्रिपरिषद् बैठकले गरेका निर्णयहरु सार्वजनिक गर्न शुक्रबार मन्त्रालयमा आयोजित पत्रकार सम्मेलनमा भन्नुभयो, “डेँगू नियन्त्रणमा स्वास्थ्य क्षेत्र, मन्त्रालय, नागरिक, सरोकार निकाय र सरकारबाट प्रयास हुँदैआएको छ । यसले दुःख दिएको छ तर समस्या नियन्त्रण बाहिर छैन ।” उहाँले डेँगू परीक्षण र उपचारका लागि आवश्यक स्रोत सामग्री व्यवस्थान भएको भन्दै नियन्त्रणका लागि जनचेतनासहित सबैको प्रयास आवश्यक हुने बताउनुभयो । उहाँले राष्ट्रिय गानको विषयलाई बहसका रुपमा मुद्दा बनाउनु पर्ने कुनै कारण नभएको बताउनुभयो ।
सञ्चारकर्मीको जिज्ञासामा प्रवक्ता बाँस्कोटाले भन्नुभयो, “राष्ट्रिय गान हाम्रो वीरता, इतिहास, मर्यादा, स्वतन्त्रता, सम्मान, आत्म स्वाभिमान, राष्ट्रिय गौरवको एकमुष्ट प्रतिबिम्ब हो । एकताको प्रतिबिम्ब हो । राष्ट्रगान बजाउनै हुँदैन, गान बज्दा उठ्नै हुँदैन भन्ने कुरा होइन । ” उहाँले राष्ट्रिय गानका विषयमा छुट्टै कानुनी प्रवन्धहरु रहेका र ति प्रवन्धहरुको आधारमा नै छलफलगरी विषयलाई टुंगो लगाउने बताउनुभयो ।
एक अर्को प्रश्नको जवाफमा मन्त्री बाँस्कोटाले स्वतन्त्र मुलुकको हैसियतमा छिमेकी मित्र राष्ट्रहरु र अन्य मित्र राष्ट्रहरुसँग आपसी हितमा सचेत भएर नै व्यवहार गर्दै आएको स्पष्ट पार्नुभएको छ । उहाँले हाम्रा पूर्ववत मान्यतामा कुनै विचलन र परिवर्तन नआएको पनि बताउनुभयो । उहाँले मेलम्ची ठेक्काको नयाँ प्रक्रिया सुरु भएकाले क्रमश काम हुँदैजाने बताउनुभयो ।
विज्ञापनलाई नियमन गर्न नयाँ इतिहास कोरिएको छ – सञ्चारमन्त्री
काठमाडौँ, भदौ २५ गते । राष्ट्रियसभाकोे बैठकले ‘विज्ञापन (नियमन गर्ने) विधेयक २०७५ माथि प्रतिनिधिसभाबाट भएको संशोधन उपर विचार गरियोस्’ भन्ने प्रस्तावलाई सर्वसम्मतिले स्वीकृत गरेको छ ।
सञ्चार तथा सूचना प्रविधिमन्त्री गोकुलप्रसाद बाँस्कोटाले सो विधेयकलाई आजको बैठकमा प्रस्तुत गर्नुभएको थियो । विधेयक माथिको सैद्धान्तिक छलफलमा उठेका जिज्ञासमा मन्त्री बाँस्कोटाले विज्ञापनलाई नियम गर्ने क्षेत्रमा नयाँ इतिहास कोरिएको बताउनुभयो । उहाँले भन्नुभयो, “ विधेयकले विज्ञापन क्षेत्रलाई थप व्यवस्थित बनाउँछ, यो कार्यान्वयनमुखी रहेको छ ।” विधेयकलाई थप समृद्ध बनाउन सहयोग गर्नुभएका दुवै सदनका सांसदलाई मन्त्री बाँस्कोटाले धन्यवाद दिनुभयो ।
यसअघि सो विधेयकको सैद्धान्तिक छलफलमा सांसद ठेगेन्द्रप्रकाश पुरी र कोलम ओलीले भाग लिनुभएको थियो । यसैगरी बैठकले ‘राष्ट्रिय परिचयपत्र तथा पञ्जीकरण विधेयक, २०७५ माथि विचार गरियोस्’ भन्ने प्रस्तावलाई सर्वसम्मतिले स्वीकृत गरेको थियो । प्रतिनिधिसभाबाट सन्देशसहित प्राप्त सो विधेयकको प्रस्तावलाई गृहमन्त्री रामबहादुर थापाले बैठकमा प्रस्तुत गर्नुभएको थियो । रासस