आपूर्ति व्यवस्थालाई सहज बनाउने गृहकाे निर्णय

देवबहादुर कुँवर / काठमाडौं चैत १३ गते । गृह मन्त्रालयले ‘स्वःकफ्र्यु’ (लक डाउन) अवधिभर खाद्यलगायत दैनिक उपभोग्य वस्तुहरूको आपूर्ति व्यवस्थालाई सहज बनाउने निर्णय गरेको छ । यस कार्यका लागि स्टोर एवं विक्रेतालाई ‘डेलिभरी भ्यान’ (गाडी) को व्यवस्था गर्न आग्रह गरेको छ ।

गृहसचिव महेश्वर न्यौपानेको अध्यक्षतामा बिहीबार सिंहदरवारमा बसेको बैठकले खाद्य सामाग्री, एलपी ग्याँस, दुध, तरकारी र फलफूललगायत वस्तुको उपलब्धता सहजीकरणका लागि ‘डेलिभरी भ्यान’ व्यवस्था गर्ने निर्णय गरेको हो ।

काठमाडौं उपत्यकाभित्रका अत्यावश्यक खाद्यवस्तुका सबै स्टोर एवं विक्रेताहरूले आफ्नै डेलिभरी भ्यान (गाडी) मार्फत् आवश्यकता बमोजिम दैनिक उपभोग्य वस्तुहरूको सहज आपूर्तिका लागि व्यवस्था मिलाउने निर्णय गरेको हो ।

यस्ता भ्यान (गाडी) हरूलाई सवारी पासको व्यवस्था सम्बन्धित जिल्ला प्रशासन कार्यालयबाट उपलब्ध गराउन र पसलहरू सञ्चालन, उपभोक्ताको माग संकलन र वितरणमा महानगरीय प्रहरीलाई सुरक्ष ाव्यवस्था मिलाउन निर्देशन समेत दिएको छ ।

गृह प्रवक्ता केदारनाथ शर्माले उपभोक्ताको माग संकलन र खाद्य सामाग्री वितरण गर्ने कार्यलाई सहज र व्यवस्थित गर्न प्रत्येक खाद्य स्टोर तथा पसलहरूलाई टोल–फ्रि एवं अन्य फोन नम्बर उपलब्ध गराई प्रचारप्रसारको व्यवस्था मिलाइएको जानकारी दिनुभयो ।

इन्टरनेटको पहुँच भएकाहरूका लागि ‘अनलाइन’ मार्फत् माग संकलन गरी प्याकेजमै वस्तु उपलब्ध गराउने निर्णय भएको जानकारी उहाँले दिनुभयो । उपभोग्य वस्तुको सहज आपूर्ति र सहजीकरणका लागि सबै नगरपालिका र गाँउपालिकाका वडा कार्यालयहरूलाई निर्देशन दिएको छ ।

काठमाडौं उपत्यका बाहिर रहेका अत्यावश्यक वस्तुका गोदाम (स्टोर) बाट समेत विक्री वितरण तथा आपूर्ति व्यवस्थालाई सहज र प्रभावकारी बनाउन ७७ वटै जिल्लाको जिल्ला प्रशासन कार्यालय, स्थानीय तह र प्रहरी कार्यालयहरूलाई निर्देशन दिएको छ ।

यस संक्रमणको अवस्थामा उपभोक्तालाई खाद्यवस्तुको सहज आपूर्तिमा सहयोग नगरी कालोबजारी, चर्को मूल्य, कृत्रिम अभाव र जम्माखोरी कार्यविरुद्ध कडा कदम चाल्ने समेत जनाइएको छ । कालोबजारी र मूल्यवृद्धि गर्ने विरुद्ध ११४९ टोल–फ्रि नम्बरमा उजुरी दिन समेत आह्वान गरिएको छ ।

कोरोना भाइरस संक्रमणबाट आफू सुरक्षित हुन र अरुहरूलाई सुरक्षित बनाउन सबै नागरिकलाई आ–आफ्नो स्थानबाट कर्तब्य पूरा गर्न अपिल भन्दै मन्त्रालयले लक डाउनको मौका छोपी घरपरिवारका सदस्य, साथीभाइ, आफन्त, इष्टमित्र र छरछिमेकी र चिनेजानेको घरमा जाने, भेला हुने तथा बाहिर निस्कने जस्ता कार्य नगर्न नगराउन समेत आग्रह गरेको छ ।

कोरोना संक्रमणबाट बच्न घरभित्रै बसम्

यसैबीच, लक डाउनको आज तेस्राै दिन मुलुकभरको जनजीवन शान्त र ठप्प रह्यो । विशेष गरी काठमाडौं उपत्यकामा प्रहरीले लक डाउन उल्लङ्घन गर्नेमाथि कडाई गरेको छ । बिहीबारबाट अत्यावश्यक कामबाहेक बाहिर निष्कनेविरुद्ध प्रहरी कडाईका साथ प्रस्तुत भएको छ ।

महानगरीय प्रहरी प्रमुख विश्वराज पोखरेलले आज तेस्रो दिन सार्वजनिक सवारी साधन चढेर भन्दा हिँडेर लक डाउनको उल्लङ्घन गर्नेको संख्या धेरै रहेको बताउनुभयो । धेरैजसोलाई सम्झाई बुझाई गरिएको र केहीलाई जुनदिशाबाट आएको छ, त्यही बाटोमा फर्काइएको छ ।

पहाडी जिल्लाहरूमा भन्दा मधेस तराई र नेपालगन्जलगायतका क्षेत्रमा लक डाउनको पूर्ण पालना नभएको भन्दै प्रहरी प्रधान कार्यालयले थप कडाई गर्न स्थानीय प्रहरीलाई निर्देशन दिएको छ । महानगरीय प्रहरीले उपत्यकाबासीका लागि कोरोना भाइरस संक्रमणबाट जोगिन घरभित्र बसम् भन्दै आएको छ ।

Related News

Comments are closed

TOP NEWSview all

Nepal’s Kushal Bhurtel nominated for ICC Men’s Player of the month award

Nepal climbs a notch up in T-20 ranking and ranked 13th

US pledges $8.5 million to Nepal to fight against COVID-19 pandemic

NOC says there won’t be shortage of petroleum products despite prohibitory orders

SC bars CIAA from conducting Sting Operations




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana Chairperson : Mr. Kishore Thapa


Counter:
Web Counter