घरमै सीमित भयो दशैंको टीका र जमरा ग्रहण
धीरेन्द्रप्रसाद साह / राजविराज, कात्तिक १० गते । हिन्दु धर्मालम्बीको महान पर्व विजयादशमी सोमबार ठूलो मान्यजनबाट जमरा लगाएर टीका ग्रहण गरेका छन । कोरोना भाइरस संक्रमणको महामारीको कारण यस वर्षको टिका लगाउने कार्यक्रम घरमै सीमित भएको छ ।
घरमा भएका ठूलो मान्यजनबाट आशिषसाथ जमरा र टीका ग्रहण गरेका छन । व्यक्तिगत, पेशागत एवं पारिवारिक सुख, शान्ति एवं समृद्धि हुने विश्वासका साथ जमरा र टीका लगाएका हुन । बिहान नुहाईधुवाई गरी नयाँ वा सफा लुगामा टीका र जमरा लगाएका छन । आफन्तजनसँगै केहीले मन्दिरमा पनि टीका र जमरा ग्रहण गरेको छिन्नमस्ता भगवती मन्दिरका पीठाधीश महानन्द ठाकुरले बताउनुभयो ।
केहीले जिल्लाको छिन्नमस्ता, कंकालिनी, भगवती मन्दिर सहितमा पुरोहितबाट टीका र जमरा थापेका छन । घटस्थापनाका दिन राखिएको जमरा काटेर मन्दिरका पुजारीहरुले बिहान शुभ साइतमा विधिवत पूजापाठ गरी सर्वसाधारणलाई टीका र जमरा प्रदान गरेको छ । पण्डितबाट जमरा र टिका लगाए वापत सर्वसाधारणले आफुखशी पुजारीलाई दक्षिणा दिएका छन भने आफन्तले जमरा टीकासाथ दक्षिणा (सगुन) पनि दिएर आशीर्वाद प्रदान गरेको छ ।
नीलकण्ठको दर्शन
विजयादशमीका दिन सोमबार बिहान नीलकण्ठ चराको दर्शन गर्न शुभ मानिने चलन पनि छ । एकाबिहानै नीलकण्ठ चराको खोजी गरेर दर्शन पनि गरेका छन । भगवान शिवको प्रतीकको रुपमा मानेर नीलकण्ठलाई दर्शन गरिन्छ । विजयादशमीका दिन नीलकण्ठ चराको दर्शन गरिएमा वर्षभरी शुभ रहनुको साथै सम्पूर्ण मनोरथ पूरा हुने जनविश्वास छ ।
नवरात्रीको दिन आदिशक्तिको उपबासपछि यस चराको दर्शनले भगवान शिवको रूपको प्रतीकात्मक दर्शन हुने बुझाइ रहेको छ । धर्म संस्कृति अनुसार भगवान शंकरलाई नीलकण्ठ पनि भने गरिन्छ ।
भगवान श्रीरामले नीलकण्ठको दर्शन गरेर रावणको बध गरिएको पौराणिक कथामा उल्लेख गरिएको छ । लंका विजयीपछि भगवान ब्राह्मण हत्याका पापलाई रामले लक्ष्मणसँगै मिलेर भगवान शिवको पूजा अर्चना गरेर सो पापबाटमुक्ती पाएको भनिएको छ । त्यसपछि भगवान शिव नीलकण्ठ चराको रूपमा पृथ्वीमा आएको र नीलकण्ठ भगवान शिवकै रुप भएको मानिने गरेको छ ।
स्वास्थ्यकर्मीले अस्पतालमै लगाइदिए संक्रमितलाई दसैँको टीका
विजयादशमीको दिनमा सबैले आ-आफ्नो घरमा रमाइलो गरेर दसैँ मनाईरहेको बेला संक्रमित भएर भेरी अस्पतालमा भर्ना भएकाहरुले पनि त्यही भित्रै टीका लगाएर दसैं मनाएका छन् । सोमवार दसैंको दिनमा पनि संक्रमितको सेवामा खटिनुभएका भेरी विशेष कोराना अस्पतालका स्वास्थ्यकर्मीहरुले संक्रमितहरुलाई टीका लगाएर शुभकामना दिंदै दसैं मनाएको अस्पतालले जनाएको छ ।
भेरी अस्पतालका प्रमुख डा. प्रकाश थापाले संक्रमितको उपचारमा खटिनुभएका स्वास्थ्यकर्मीहरुले सबै संक्रमितलाई टीका लगाएर प्रसाद वितरण गरी दसैं मनाएको बताउनुभयो ।
संक्रमित भएर त्यहाँ उपचार गराइरहनुभएका भेरी अस्पतालका बायोमेडिकल टेक्निसियन नविन चन्द ठकुरीले संक्रमितको उपचार सेवामा दिनरात खटिनुभएका कोभिड इन्चार्ज सम्झना मण्डल, स्टाफ नर्सहरु यम कुमारी थापा, कमला नेपाली र देवा जिसीले सबै संक्रमितलाई टिका लगाउनुभएको बताउनुभयो ।
उहाँले स्वास्थ्यकर्मीहरुले टीका लगाएपछि आफन्त र घर परिवार नहुँदा निराश भएकाहरुलाई धेरै राहात मिलेको बताउनुभयो ।
आफ्नो ज्यानको परवाह नगरि दिनरात संक्रमितको सेवा गर्ने स्वास्थ्यकर्मीहरुले टीका लगाएपछि धेरै खुशी लागेको एक संक्रमितले बताउनुभयो । उहाँले एक्कासि टीका लगाउन स्वास्थ्यकर्मीहरु आएपछि दुखी भएर बसेका सबै संक्रमितको अनुहारमा उज्यालो र मुस्कान देखिएको बताउनुभयो ।
अस्पतालका बायोमेडिकल टेक्निसियन ठकुरीका अनुसार हाल भेरी विशेष कोराना अस्पतालमा ८ जना स्टाफसहित ४५ जना संक्रमितको उपचार भइरहेको छ । ती मध्ये आठ जनाको अवस्था गम्भीर रहेको अस्पतालले जनाएको छ ।
उपचाररत संक्रमितको मनोबल उच्च पार्नका लागि आफूहरुले उपचार सेवा लगायत सबै प्रकारका गतिविधि पनि निरन्तर गरिरहेको कोभिड इन्चार्ज सम्झना मण्डलले बताउनुभयो ।
उहाँले उच्च मनोबल राखेर कोरोनासँग लड्ने हो भने जित्न सजिलो रहेको जनाउँदै सबैलाई मनोबल उच्च राख्न आग्रह गर्नुभएको छ ।
बाँकेमा हालसम्म कोरोनाबाट संक्रमितको संख्या दुई हजार ९९० पुगेको छ भने ३० जनाको कोरोनाका कारण मृत्यु भईसकेको छ । अझै पनि ३३८ जना विभिन्न अस्पताल र आइसोलेसन सेन्टरमा उपचाररत भर्ना रहेको जिल्ला कोभिड १९ संकट व्यवस्थापन केन्द्र बाँकेले जनाएको छ ।