सगरमाथा आरोहणमा ४२ आरोही समूहले लिए अनुमति

सिबी अधिकारी / काठमाडौँ, वैशाख १४ गते । सर्वोच्च शिखर सगरमाथा आरोहणका लागि ४२ आरोही समूहका ३९४ जनाले आरोहण अनुमति लिएका छन् । यो सङ्ख्या सन् २०१९ को वसन्त यामको भन्दा बढी हो । उक्त वर्षको वसन्त याममा सगरमाथा आरोहणका लागि ४१ आरोही समूहले आरोहण अनुमति लिएका थिए ।

संस्कृति, पर्यटन तथा नागरिक उड्डयन मन्त्रालयअन्तर्गतका पर्यटन विभागले हालसम्म जारी गरेको पर्मिटमा सगरमाथाका लागि सर्वाधिक ४२ आरोही समूह छन् । अझै केही दिन आरोही आउने भएकाले यो सङ्ख्या बढ्न सक्ने अनुमान गरिएको छ ।

विभागका अनुसार सगरमाथाका लागि ४२ सहित ८२ आरोही समूहका ७२३ आरोहीले आरोहण अनुमति लिएका छन् । सगरमाथापछि सबैभन्दा बढी ल्होत्से हिमाल आरोहणका लागि १३ आरोही समूह छन् । धौलागिरिमा पाँच र अन्नपूर्ण हिमालमा आठ आरोही समूहले आरोहणको अनुमति पाएका छन् ।

कोभिड–१९ महामारीकाबीच सञ्चालन भइरहेको पर्वतारोहणका लागि ७०० भन्दा बढी विदेशीको आगमनले मुलुकको पर्वतीय पर्यटन सुरक्षित रहेको सकारात्मक सन्देश विश्वभर प्रवाह गरेको विभागको बुझाइ छ । विभागका निर्देशक मीरा आचार्यले अहिलेको असहज परिस्थितिमा पनि उल्लेख्य सङ्ख्यामा विदेशी हिमाल आरोहणमा आउनुले विश्व पर्यटन बजारमा सकारात्मक सन्देश गएको बताउनुभयो ।

उहाँले नेपालका आठ हजार मिटर अग्ला हिमाल आरोहणमा धेरै सङ्ख्यामा विदेशीको आगमनले पर्वतीय पर्यटनमा उत्साह जगाएको उल्लेख गर्नुभयो ।

वसन्त यामको आरोहणमा अझै आरोही बढ्ने विभागको अनुमान छ । अप्रिल महिनाभर आरोही आउने भएकाले विभागले धमाधम पर्मिट जारी गरिरहेको छ । नेपाल सरकारले हिमाल आरोहणका लागि ३६५ दिननै आरोहण खुला राखेकाले पर्वतारोहणमा उत्साहका साथ आरोहीको आकर्षण बढ्ने जनाइएको छ ।

मे पहिलो सातादेखि सगरमाथा आरोहण

सगरमाथाको चुचुरोसम्म बाटो बनाउने आइसफल डाक्टर अहिले सगरमाथाको क्याम्प चारमा पुगिसकेका छन् । मौसमले साथ दिएमा सगरमाथा आरोहण आगामी मे पहिलो साताबाट शुरु हुने विभागको अनुमान छ । “डोरी टाँग्ने टोली अहिले सगरमाथाको क्याम्प चारमा पुगेको छ । मौसमले साथ दिए सगरमाथा आरोहण यसै हप्ताबाट हुन्छ । सकेसम्म मे पहिलो सातामा सगरमाथाको चुचुरोमा डोरी टाँगेर आरोहण शुरु गर्ने योजनामा छ”, विभागका निर्देशक आचार्यले भन्नुभयो ।

कोभिड महामारीका कारण सन् २०२० को वसन्त ऋतुको आरोहण स्थगित भएको थियो । सन् २०१९ को वसन्त ऋतुको आरोहण वैशाख ३१ गतेदेखि शुरु भएको थियो । त्यस्तै सन् २०१८ को वसन्त आरोहणमा पनि वैशाख ३१ गतेदेखि सगरमाथा आरोहण शुरु भएको थियो ।

वसन्त यामको हिमाल आरोहणबाट हालसम्म रु ५३ करोडभन्दा बढी रोयल्टी सङ्कलन भएको विभागको पर्वतारोहण शाखाले जनाएको छ । रोयल्टी जम्मा भएका हिसाबले पनि सन् २०२१ को वसन्त आरोहण उत्साहवद्र्धक देखिएको छ । सन् २०१९ मा वसन्त यामको आरोहणबाट रु ५१ करोड रोयल्टी जम्मा भएको थियो ।

Related News

Leave a Reply

टाइप गरेर स्पेस थिच्नुहोस् र नेपाली युनिकोडमा पाउनुहोस। (Press Ctrl+g to toggle between English and Nepali OR just Click on the letter). अंग्रेजीमा टाइप गर्न "अ" मा थिच्नुहोस्।

*

TOP NEWSview all

NRNA to supply Oxygen Concentrators to Nepal

Kami Rita scales Everest 25 times; Tourism Ministry appeals not to disseminate fake information

Humla section of Karnali Corridor built in timeframe

Nepal’s Kushal Bhurtel nominated for ICC Men’s Player of the month award

Nepal climbs a notch up in T-20 ranking and ranked 13th




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana Chairperson : Mr. Kishore Thapa


Counter:
Web Counter