अडानद्वारा २१ बुँदे प्रस्ताव पारित
काठमाडौं, जेठ १४ गते । नेपाल अडिटर्स एसोसिएसन (अडान) केन्द्रीय कार्यसमितिको तेस्रो पूर्ण बैठक २१ बुँदे प्रस्ताव जारी गर्दै सकिएको छ ।
शनिबार काठमाडौँको बानेश्वरमा बसेको संयुक्त बैठकले भुटानी शरणार्थी प्रकरणमा दोषीले सजाय पाउनुपर्ने, राष्ट्रिय उत्पादनको बजार सुनिश्चित गर्नुपर्ने तथा देशको वर्तमान आर्थिक स्थितिको सुधार र सत्य, तथ्य छानबिन बिना लेखापरीक्षकलाई प्रहरीद्वारा पक्राउ गर्ने काम रोक्ने विषयमा बैठकले सरकारसमक्ष माग गर्ने निर्णय भएको अडानका प्रचार प्रसार विभाग एवम् प्रथम उपाध्यक्ष डोल प्रसाद दाहालले बताउनुभयो ।
यस्तै, अन्य विषयमा पछिल्लो समय देशमा काम पाउने स्थिति नभएर विदेशमा जानुपर्ने बाध्यात्मक परिस्थिति भएकाले आगामी दिनमा यसले निम्त्याउने समस्याप्रति सचेत रहनसमेत सरकारसँग माग गर्ने निर्णय भएको उहाँको भनाइ छ ।
आगामी आर्थिक वर्षको बजेटमा चालु खर्च घटाई पुँजीगत खर्चमा वृद्धि गर्नुपर्ने माग पनि अघि सरिएको छ ।
देशको विकासमा आर्थिक सुशासन कायम गर्न, देशमा विभिन्न बेथिति मौलाउन नदिन राज्यका सबै निकाय जनतासँग जोडिएका साझा समस्याहरूप्रति गम्भीर भई उत्तरदायित्व हुन सरकारसँग माग गर्ने निर्णय भएको दाहालले बताउनुभयो ।