एमाले लुम्बिनी प्रदेश अधिवेशन बुटवलमा सुरु
बुटवल, भदौ १६ गते । नेकपा (एमाले) लुम्बिनी प्रदेशको प्रथम अधिवेशन बुटवलमा सुरु भएको छ । अधिवेशनको पार्टीका अध्यक्ष तथा पूर्व प्रधानमन्त्री केपी शर्मा ओलीले एक समारोहबीच केहीबेर अघि उद्घाटन गर्नुभयो ।
उद्घाटन कार्यक्रममा पार्टीका उपाध्यक्ष विष्णुप्रसाद पौडेल, महासचिव शङ्कर पोखरेल, उपमहासचिव प्रदीपकुमार ज्ञवाली, सचिव तथा प्रदेश इन्चार्ज पद्मा अर्याल, सचिव गोकर्णराज विष्ट, पार्टीका अन्य नेताहरूको सहभागिता रहेको छ ।
उदघाटनसत्रलाई सम्बोधन गर्दै उपाध्यक्ष विष्णुप्रसाद पौडेल र महासचिव शङ्कर पोखरेलले लुम्बिनीको समग्र विकासका लागि पार्टी एकताबद्ध रहेको बताउनुभयो । एमालेभित्र कुनै गुट नभएको दाबी गर्नुहुँदै लुम्बिनीको दिगो विकासमा पार्टी एक ढिक्का रहेको उहाँहरूको भनाइ छ ।
सोहीअनुसार उपमहासचिव प्रदीपकुमार ज्ञवालीले प्रमुख प्रतिपक्षी दल एमालेमाथि चौतर्फी प्रहार जारी रहेकाले सबै नेता कार्यकर्ता गम्भीर भएर काम गर्नुपर्ने आवश्यकता रहेको बताउनुभयो । एमालेको शक्तिलाई कमजोर बनाउन देशी विदेशी शक्तिहरू लागेकाले सबै नेता कार्यकर्ता हर प्रहर सिपाही भएर पार्टी संरक्षण र विस्तारमा लाग्न उहाँले आग्रह गर्नुभयो ।