फलफूलका विरुवा हुर्काउँदै सामुदायिक वन
जानु पाण्डे / कपिलवस्तु, भदौ २० गते । कपिलवस्तुको बाणगंगा नगरपालिका –९ मा रहेको खोजीपुर सामुदायिक वनले फलफूल खेतीलाई प्राथमिकता दिएको छ । सामुदायिक वनले विपन्न समुदायको आर्थिक विकासमा टेवा पुगाउन पहिलो पटक फलफूलका बोट बिरुवा लगाइएको उपभोक्ता समितिका अध्यक्ष दिपककुमार थापाले बताउनुभयो ।
२०६६ सालमा समुदायमा हस्तान्तरण गरिएको वनको जिनुवा बस्ती नजिकको क्षेत्रमा फलफुलका विरुवा लगाइएको छ । खाली चौर र अतिक्रमण खालीगरी वृक्षारोपण गरिएको छ । यसै वर्ष १० हेक्टर खाली क्षेत्रमा फलफूलको बिरुवा लगाएको सामुदायिक वनले जनाएको छ ।
आँप, लिची, अमला, कटहरलगायत जातका फलफुलका बिरुवा लगाइएको छ । यसैगरी कोइली नदीले कटान गर्दैआएको तट जोगाउन करिव ५ हेक्टर क्षेत्रफलमा बाँसको बिरुवा लगाइएको छ । वृक्षारोपण गरिएको बिरुवा जोगाउन तारबार गरिएको छ ।
वनको आम्दानीले सार्वजनिक शौचालय, सिंचाइँ सुविधाका लागि १२६ मिटर नहर निर्माण भएको छ । वनले सभाहल निर्माणको चरणमा रहेको छ । वनमा गत वर्ष उत्पादन भएका १९ हजार घनफिट काठ लिलाम बढाबढगरी बिक्री गर्ने तयारी रहेको छ । सो वन २७६.५ हेक्टर क्षेत्रफलमा फैलिएको छ ।