राजनीतिसँगै २९० रोपनी बाँझो जमिनमा मेवा खेती

अमरराज नहर्की / तनहुँ, असोज १७ गते । तनहुँको एक युवकले राजनीतिसँगसगै व्यावसायिक कृषि पेशा अँगाल्नुभएको छ । व्यासनगरपालिका–१३ बेलबास निवासी वसन्त आलेले सोही ठाउँ नजिकै पोखरी भञ्ज्याङमा व्यवसायिक रुपमा मेवाखेती शुरु गर्नुभएको हो । मेवाखेतीको लागि आलेले जग्गा भाडामा लिनुभएको छ । नेपाल विद्यार्थी सङ्घको केन्दीय सदस्य तथा जिल्ला अध्यक्ष भएर नेतृत्व लिई सक्नु भएका आलेले ताइवन रेडलेडी ७८६ जातको मेवाको खेती गर्नुभएको छ ।

फल राम्रो लाग्ने र बिक्रीको लागि पन्ध्र्र दिनसम्म टिकाउ हुने भएकोले सो जातको मेवाखेती गरिएको आले बताउनुहुन्छ । स्थानीय जातको मेवा दुई÷तीन दिन पनि टिकाउ नहुने र कुहिने भएकोले नयाँ जातको मेवाको बिरुवा लगाएको आलेको भनाइ छ ।

पहिलो पटक अनुभव लिँदैछु, कस्तो फल दिन्छ हेर्न बाँकी छ, राम्रो भएमा खेती विस्तार गर्दै लैंजान्छु’’ आलेले भन्नुभयो । दुई सय ९० रोपनी क्षेत्रफलको बाँझो जमिनलाई भाडामा लिएर दुई हजार बिरुवा हुर्काइसकेको र थप पाँच हजार बिरुवा लगाउने काम भइरहेको कृषक आलेले जानकारी दिनुभयो ।

छ महिना अघि लगाइएको बिरुवा फल लागेर छिप्पिदैै गएकोले एक वर्षमै आम्दानी लिन सकिने विश्वास लागेको आले बताउनुहुन्छ । हाल भारतमा उत्पादन भएको मेवाले ९९ प्रतिशत बजार लइरहेकोले आलेले उत्पादन गरेपछि आयात घटाउन मद्धत पुग्ने विश्वास लिईएको कृषि ज्ञानकेन्द्र तनहुँका प्रमुख कुलप्रसाद तिवारीले बताउनुभयो । ‘‘नेपालको हावापानी राम्रो भएकोले स्वादिलो हुनुको साथै जमिन बाँझो रहेर खेर गइरहेकोले स्वदेशी उत्पादन बढाउन मेवा खेती नै रोज्नु उपयुक्त देखिएको छ’’ केन्द्र प्रमुख तिवारीले भन्नुभयो । कृषक आलेको मेवाखेतीको स्थलगत रुपमै अध्ययन गरेर प्राविधिक ज्ञान समेत प्रदान गरिएको तिवारीले जानकारी दिनुभयो । ‘‘ठूलो जोश र जाँगरका साथ आलेले खेती शुरुवात गरेको देखियो, उदाहरणीय बनि जमिन बाँझो राख्न हुँदैन भन्ने सन्देश प्रवाह गरेको छ’’ तिवारीले भन्नुभयो ।

प्रतिरोपनी वार्षिक रुपमा एक हजार भाडा दिने गरी जमिन भाडामा लिएको उहाँले जानकारी दिनुभयो । १० वर्षसम्मको लागि जग्गा भाडामा लिइएको र सोही क्षेत्रमा बाख्रा तथा पाडा पाल्नको लागि खोर गोठ निर्माण गर्ने योजना बनाएको आलेले बताउनुभयो । एउटा बीउको रु.२८ परेको आले बताउनुहुन्छ । ताइवनबाट दश ग्राम प्याकेटको रु.नौ हजार परेको र फल राम्रो फल्ने जानकारी समेत पाएको कृषक आले बताउनुहुन्छ । आले वि.स.०५१ सालमा दमौलीस्थित आदिकवि भानुभक्त क्याम्पसमा स्ववियू सभापति हुँदै ०५३ बाट ०६९ सम्म तीन कार्यकाल नेपाल विद्यार्थी सङ्घ तनहुँका जिल्ला अध्यक्षको नेतृत्व लिएर काम गरिसक्नुभएको छ । राजनीति र कृषिकर्मलाई सँगसगै लैजाने आले बताउनुहुन्छ ।