अमेरिकी विशेष दूत गोरको नेपाल भ्रमण सम्पन्न
काठमाडौँ, वैशाख १९ गते । दक्षिण तथा मध्य एसियाका लागि अमेरिकी विशेष दूत सर्जियो गोरले नेपाल भ्रमण सम्पन्न गर्नुभएको छ । भ्रमणका क्रममा उहाँले नेपाल र संयुक्त राज्य अमेरिकाबीचको द्विपक्षीय साझेदारीलाई सुदृढ बनाउने विषयमा विभिन्न उच्चस्तरीय भेटवार्ता गर्नुभएको काठमाडौँस्थित अमेरिकी दूतावासले जनाएको छ ।
विशेष दूत गोरले भ्रमणका क्रममा परराष्ट्रमन्त्री शिशिर खनाल, अर्थमन्त्री डा. स्वर्णिम वाग्ले र राष्ट्रिय स्वतन्त्र पार्टीका सभापति रवि लामिछानेसँग छुट्टाछुट्टै भेटवार्ता गर्नुभएको थियो । ती भेटमा नेपालको प्रविधि क्षेत्रमा अमेरिकी व्यावसायिक अवसरको विस्तार र व्यापारिक सम्बन्ध प्रवर्द्धन गर्ने विषयमा केन्द्रित रहेर छलफल भएको दूतावासले जनाएको छ । उहाँले नेपाली व्यवसायीसँग पनि व्यावसायिक सहकार्यका विषयमा सार्थक विचार विमर्श गर्नुभएको थियो ।
भ्रमणकै क्रममा विशेष दूत गोरले सगरमाथा आधार शिविरको अवलोकन गर्नुभयो । त्यहाँ उहाँले सगरमाथा सफाइ अभियानमा संलग्न नेपाली संस्थाका योजनाबारे जानकारी लिनुका साथै अमेरिकी ड्रोन प्रविधिको उपयोगिताका बारेमा समेत बुझ्नुभएको थियो । नयाँ ड्रोन प्रविधिको प्रयोगले सगरमाथा क्षेत्रमा सामग्री ढुवानीलाई सहज र छिटो बनाउने अपेक्षा गरिएको छ ।
विशेष दूत गोरले भन्नुभयो, “संयुक्त राज्य अमेरिका नवप्रवर्तनमा अग्रणी छ र नेपालमा अत्याधुनिक प्रविधि भित्र्याउन स्थानीय कम्पनीसँग सहकार्य गर्न पाउँदा हामी प्रसन्न छौँ ।” उहाँले नेपालको नयाँ सरकारले दुई देशबीचको साझेदारीलाई थप बलियो बनाउने विश्वास समेत व्यक्त गर्नुभयो ।
यसैगरी, विशेष दूत गोरले काठमाडौँस्थित न्हूः छेँ बहामा आयोजित एक विशेष समारोहमा सहभागिता जनाउनुभयो । सो अवसरमा संयुक्त राज्य अमेरिकाबाट फिर्ता ल्याइएको अक्षोभ्य बुद्धको मूर्ति नेपाललाई हस्तान्तरण गरिएको थियो । अमेरिकाले नेपालबाट गैरकानुनी रूपमा बाहिर लगिएका धार्मिक तथा सांस्कृतिक सम्पदा फिर्ता गर्न सदैव प्रतिबद्ध रहेको उहाँले दोहोर्याउनुभयो । उहाँले ऐतिहासिक भक्तपुर दरबार क्षेत्रको समेत भ्रमण गरी नेपालको समृद्ध संस्कृति र इतिहासको अनुभव लिनुभएको थियो ।