महासचिव शंकर पोखरेलले ओलीलाई भने, यथास्थितिमा अघि बढ्न सकिँदैन, मार्ग प्रशस्त गर्नुस्
काठमाडौँ । नेकपा एमालेको जारी केन्द्रीय सचिवालय बैठकमा अध्यक्ष केपी शर्मा ओलीको राजीनामा माग्ने क्रम बढेको छ । शुक्रबारको बैठकमा चार उपाध्यक्षले अध्यक्ष ओलीको राजीनामा मागेकोमा शनिबार पनि महासचिव शंकर पोखरेल, उपमहासचिव योगेश भट्टराई लगायतका नेताहरूले अध्यक्ष ओलीलाई राजीनामा दिएर मार्ग प्रशस्त गर्न भनेका हुन् ।
यसअघि अध्यक्ष ओलीलाई साथ दिँदै आएका महासचिव शंकर पोखरेलले शनिवारको बैठकमा खुलेरै ओलीलाई मार्ग प्रशस्त गर्न आग्रह गरेको एक नेताले बताए ।
‘पार्टी पुनर्गठनको आवाज ठुलो छ । अव पार्टी यतिकै अवस्थामा अघि बढ्न सक्दैन’, महासचिव पोखरेलले बैठकमा भनेका छन्, ‘यथास्थितिबाट अघि बढ्न सकिँदैन ।’ पोखरेलले राजीनामाको शब्द प्रयोग नगरेर मार्ग प्रशस्त भन्ने शब्द प्रयोग गरेका थिए । तर, बैठकमा उपमहसचिव योगेश भट्टराईले भने राजीनामा शब्द नै प्रयोग गरेका थिए ।
पोखरेल र भट्टराईबाहेक शनिवारको बैठकमा उपमहासचिव रघुवीर महासेठ, लेखराज भट्ट लगायतले पनि आफ्नो धारणा राखेका थिए ।
त्यस्तै सचिवहरू छविलाल विश्वकर्मा, राजन भट्टराई, महेश बस्नेत, हिक्मत कार्की लगायतले अहिलेको पार्टीको अवस्थाबारे आफ्ना धारणा राखेका थिए ।
भोलिको बैठकमा शेरधन राई,भानुभक्त ढकाल, खगराज अधिकारी र यमलाल कँडेलले धारणा राखेपछि बैठक सकिने छ ।
यसअघि शुक्रबार उपाध्यक्षहरू रामबहादुर थापा बादल, विष्णुप्रसाद पौडेल,पृथ्वी सुब्बा गुरुङ, रघुजी पन्त, गोकर्ण विष्टले धारणा राखेका थिए ।
उपाध्यक्ष थापाबाहेकका नेताहरूले पार्टी पुनर्गठनका लागि अध्यक्ष केपी शर्मा ओलीले राजीनामा गरेर मार्ग प्रशस्त गर्नुपर्ने बताएका थिए ।