रास्वपा प्रथम महाधिवेशनको अन्तिम तयारी
काठमाडौँ, असार ६ गते । चितवनको भरतपुरमा राष्ट्रिय स्वतन्त्र पार्टी (रास्वपा) को ऐतिहासिक प्रथम महाधिवेशनको तयारी अन्तिम चरणमा पुगेको छ ।
महाधिवेशनअघि शनिबार भरतपुरमा आयोजित केन्द्रीय समितिको बैठकमा बोल्दै पार्टी सभापति रवि लामिछानेले महाधिवेशन पार्टीलाई थप वैधानिक, संस्थागत र लोकतान्त्रिक ढङ्गले अगाडि बढाउने महत्त्वपूर्ण अवसर भएको बताउनुभएको छ ।
रास्वपाले २०८२ को प्रतिनिधिसभा निर्वाचनमा ‘थिति बसाल्ने सङ्कल्प’ को मुख्य नारासहित जारी गरेको वाचा पत्र २०८२ मा ‘सदाचार र असल शासन’, ‘मध्यम वर्गीय विस्तार’, ‘काम, काम, काम’, ‘कनेक्टिभिटी’ र ‘प्रवास’ का विषय मुख्य प्राथमिकतामा राखेको छ ।
सार्वभौमिकता, स्वाधीनता, भौगोलिक अखण्डता र स्वाधिमानलाई अक्षुण्ण राख्दै सो बमोजिमको प्रतिफल स्वरुप ‘समुन्नित’ पाँच वर्षभित्र भुक्तान गर्ने सर्तमा नागरिक करार मञ्जुरपत्र गरेको छ ।
सञ्चार कर्म परित्याग गर्दै सभापति लामिछानेले २०७९ असार ७ गते काठमाडौँमा एक कार्यक्रम आयोजना गरी ‘राष्ट्रिय स्वतन्त्र पार्टी’ को घोषणा गर्नुभएको हो । जसको मुख्य नारा सार्वजनिक भयो, ‘अब जान्नेलाई छान्ने’ ।
सभापति रवि लामिछाने पहिलो पटक २०७९ सालको प्रतिनिधिसभा निर्वाचनमा चितवन क्षेत्र नंं २ बाट सांसद विजयी हुनुभयो ।
प्रतिनिधिसभा निर्वाचन २०७९ मा नेपाली कांग्रेस संसदको पहिलो ठूलो दल (८९ सिट) बन्यो । नेकपा (एमाले) दोस्रो (७८ सिट), नेकपा (माओवादी केन्द्र) तेस्रो (३२ सिट), राष्ट्रिय स्वतन्त्र पार्टी (२० सिट) नयाँ शक्तिको रुपमा चौथो नम्बरमा उदायो ।
जसमा पुराना दल राष्ट्रिय प्रजातन्त्र पार्टी (राप्रपा) पाँचौं, जनता समाजवादी पार्टी (जसपा) छैटौँ र नेकपा (एकीकृत समाजवादी) सातौँ स्थानमा खुम्चियो । उक्त निर्वाचनमा परिणाम पश्चात् कांग्रेस–माओवादी गठबन्धन सत्ता गठनका लागि प्रयास भए पनि त्यो असफल रह्यो ।
२०७९ पुस १० गते एमाले–माओवादीबिच भएको सत्ता गठबन्धनको सहमति भयो । रास्वपा, राप्रपा जनमत पार्टीलगायतको समर्थनमा सो सरकार निर्माण भयो ।
तत्कालीन राष्ट्रपति विद्यादेवी भण्डारीले तत्कालीन माओवादीका अध्यक्ष पुष्पकमल दाहाल ‘प्रचण्ड’लाई प्रधानमन्त्रीमा नियुक्त गर्नुभयो । सो समय मन्त्रीपरिषद्मा उपप्रधान तथा अर्थमन्त्री विष्णुप्रसाद पौडेल, उपप्रधान तथा भौतिक पूर्वाधार तथा यातायातमन्त्री नारायणकाजी श्रेष्ठ र उपप्रधान तथा गृहमन्त्रीमा रास्वपा सभापति लामिछाने निुयक्त हुनुभयो । रास्वपा पहिलो पटक सरकारमा सहभागी भएको हो ।
सर्वोच्च अदालतले नागरिकता प्रकरणमा तत्कालीन उपप्रधान तथा गृहमन्त्री लामिछानेको सांसद पद खारेज गर्यो । यससँगै उहाँ गृहमन्त्री पदबाट मुक्त हुनुभयो ।
यसपछि चितवन–२ को उपनिर्वाचनबाट लामिछाने पुनः सांसद विजयी हुनुभयो । २०८० फागुन २३ गते प्रचण्ड नेतृत्वको सरकारमा दोस्रो पटक पुनः उपप्रधान तथा गृहमन्त्री पदमा नियुक्त हुनुभयो ।
२०८२ निर्वाचनमा बहुमत
रास्वपा २०८२ को प्रतिनिधिसभा निर्वाचनमा एक सय ८२ सिटसहित संसद्को ठूलो दल बन्न सफल भयो । जसमा नेपाली कांग्रेस ३८ सिटले दोस्रो, नेकपा (एमाले) २५ सिटसहित तेस्रो र नेपाली कम्युनिस्ट पार्टी १७ सिटसहित चौथो स्थानमा छ ।
यो निर्वाचनमा नयाँ दलको रुपमा रहेको श्रम संस्कृति पार्टीले पनि राष्ट्रिय दलको मान्यता पायो । उसले सात सिट जितेको छ ।
रास्वपाको उद्गम स्थल मानिएको चितवनमा हुन लागेको प्रथम महाधिवेशनमा रास्वपा वरिष्ठ नेता प्रधानमन्त्री वालेन्द्र शाह सँगै प्रमुख दलका शीर्ष नेता सहभागी हुनुहुँदैछ ।
यस्तो छ महाधिवेशन कार्यतालिका, असार ९ गते मतदान
रास्वपाको शनिबार साँझ महाधिवेशन कार्यतालिका सार्वजनिक भएको छ । उक्त कार्यतालिका अनुसार असार ६ गते राति ८:३० बजे पार्टीको वेबसाइतमार्फत महाधिवेशन प्रतिनिधिका प्रारम्भिक नामावली प्रकाशन गर्ने, असार ७ गते राति ८:३० सम्म महाधिवेशन प्रतिनिधिमाथि दाबी विरोध, असार ७ गते राति ११ बजेसम्म महाधिवेशन प्रतिनिधिहरुका अन्तिम नामावली प्रकाशन गर्ने कार्यतालिका तय भएको छ ।
यसैगरी, असार ८ गते दिउँसो १ बजेदेखि उम्मेदवारी मनोनयनका लागि फाराम वितरण सुरु, सोही दिन गते दिउँसो २ बजेदेखि ४ बजेसम्म उम्मेदवारी मनोनयन दर्ता सुरु, साँझ ६ बजे उम्मेदवारहरुको प्रारम्भिक नामावली प्रकाशन, साँझ ६ बजेदेखि ७ बजेसम्म उम्मेदवारहरुविरुद्ध दाबी विरोध गर्ने, बेलुका ७ देखि ९ बजेसम्म दाबी, विरोध परेका उम्मेदवारहरुबारे जाँचबुझको समय, ९:१५ सम्म उम्मेदवारको नाम फिर्ता लिने अन्तिम समय, रातिको ११ बजे उम्मेदवारहरुको अन्तिम नामावली प्रकाशन गर्ने कार्यतालिका छ ।
असार ९ गते बिहानको ८:३० देखि दिउँसो ३ बजेसम्म पहिलो चरणको मतदान सुरु, मतदान सम्पन्न भएको दुई घण्टापछि पहिलो चरणको मतगणना र मतपरिणामको घोषणा र दोस्रो चरणको उम्मेदवारी तथा अन्य थप निर्वाचन कार्यतालिका पछि प्रकाशन गर्ने जनाइएको छ ।