चालिस लाखको स्वास्थ्य उपकरण प्रदान; विद्यालय पुनःनिर्माणका लागि प्रवासीको सहयोग
बागलुङ, ६ जेठ । गलकोट समाज जापानले यहाँका १२ वटा स्वास्थ्य संस्थालाई रु ४० लाख बढीको स्वास्थ्य उपकरण र सामग्री प्रदान गरेको छ ।
हरिचौरस्थित गलकोट प्राथमिक स्वास्थ्य केन्द्रसहित अन्य ११ गाविसका स्वास्थ्य चौकीलाई गरी रु ४० लाख २८ हजारको उपकरण प्रदान गरेको हो । पश्चिमाञ्चल क्षेत्रीय स्वास्थ्य निर्देशनालयका निर्देशक डा तारानाथ पौडेल र गलकोट समाज जापानका अध्यक्ष हर्क थापाले ती उपकरण तथा सामग्री हस्तान्तरण गर्नुभयो ।
जसमा गलकोट प्राथमिक स्वास्थ्य केन्द्रलाई सबैभन्दा बढी रु २९ लाख २८ हजार मूल्य बराबरका उपकरण दिइएको छ । बाँकी गलकोटका ११ गाविसमा रहेका स्वास्थ्य चौकीलाई रु एक लाख मूल्यका स्वास्थ्य उपकरण र सामग्री प्रदान गरिएको समाजका अध्यक्ष थापाले जानकारी दिनुभयो । उपकरण पाउने स्वास्थ्य चौकीमा हटिया, मल्म, पाण्डवखानी, काँडेबास, रिघा, दुदिलाभाटी, नरेठाँटी, हिल, तारा, अर्गल र अमरभूमि रहेका छन् ।
विभिन्न २३ प्रकारका उपकरण प्रदान गरिएको समाजले जनाएको छ । जसमा (भिडियो एक्स–रे), (एक्स–रे), (इसिजी), (निबुलाइजर), (प्रसूति बेड) लगायतका उपकरण रहेका छन् । “जापानमा रहेका गलकोटेहरुको सहयोगले यो सम्भव भएको हो, आफ्नो आम्दानीको केही अंश कटाएर गाउँठाउँका लागि योगदान गर्न खोजेका हौँ” समाजका अध्यक्ष थापाले भन्नुभयो । समाजले गत अङ्ग्रेजी नयाँ वर्षमा जापानमा साङ्गीतिक कार्यक्रम राखेर स्वास्थ्य शिविर राख्न र उपकरण सहयोग गर्न आर्थिक सहायता जुटाएको थियो । रासस
यसैगरि, म्याग्दीको पिप्ले–७ कलेजाबाङमा रहेको हिमालय प्राथमिक विद्यालयको पुनःनिर्माणका लागि बेल्जियममा रहेका म्याग्देलीले आर्थिक सहयोग गरेका छन् ।
भूमिगत पहिरोका कारण जीर्ण अवस्थामा पुगेको विद्यालयलाई नयाँ ठाउँमा स्थानान्तरण गरी पुनःनिर्माणका लागि बेल्जियममा रहेका राखुबासी र म्याग्देलीले रु पाँच लाख ५६ हजार ३५२ आर्थिक सहयोग गरेका हुन् ।
उक्त सहयोग बुधबार विद्यालय स्थानान्तरण गरी पुनःनिर्माण गर्न लागिएको स्थानमा आयोजित एक कार्यक्रमका बीच विद्यालयलाई हस्तान्तरण गरिएको छ । कार्यक्रममा कलेजाबाङ घर भई हाल बेल्जियममा रहनुभएका म्याग्दी प्रवासी नेपाली सङ्घ (मोना) बेल्जियमका उपाध्यक्षसमेत रहनुभएका गणेश भण्डारीले भवन निर्माण समितिका अध्यक्ष शान्तबहादुर भण्डारी र प्रधानाध्यापक शिवलाल भण्डारीलाई हस्तान्तरण गर्नुभएको थियो ।
विद्यालयलाई उपलब्ध गराइएको उक्त सहयोगमध्ये मोना बेल्जियममार्फत रु ७५ हजार र ३६ जना सहयोगदातामार्फत थप रु चार लाख ८१ हजार ३५२ सहयोग जुटाइएको थियो । रासस