क्याम्पसको रकम दुरुपयोग गर्नेविरुद्ध मुद्दा दायर
काठमाडौँ, १६ जेठ । अख्तियार दुरुपयोग अनुसन्धान आयोगले बडीमालिका क्याम्पस कलदेवमाडौँका क्याम्पस प्रमुख नवराज जैसी र लेखापाल लालबहादुर रावलले रु ३७ लाख ७१ हजार ९४१ भ्रष्टाचार गरेको अभियोगमा विशेष अदालतमा मुद्दा दायर गरेको छ ।
आयोगका अनुसार क्याम्पस प्रमुख जैसी र लेखापाल रावलले विभिन्न आर्थिक वर्षमा क्याम्पसमा प्राप्त भएको रकमको झुठा बिल भर्पाइ बनाई बद्नियतपूर्वक भ्रष्टाचार गरेको पाइएको छ । आयोगले भ्रष्टाचार गरेको रकम बडीमालिका क्याम्पसलाई नै दिलाउन उनीहरुबाटै असुलउपर गर्न र बिगोबमोजिम जरिवाना गर्नसमेत माग गरेको छ ।
यस्तै प्रचलित कानुन र विधिबमोजिम लेखा परीक्षकद्वय तिलकबहादुर थापा र चेतबहादुर बमले पनि क्याम्पसले तयार पारेको झुठा र बद्नियतपूर्ण बिल तथा भर्पाइलाई पुष्टि गरी गलत कामलाई प्रश्रय दिएको आयोगको ठहर छ । आयोगले आरोपी सबैलाई हदैसम्मको कारबाहीको माग गरेको छ । रासस