वैदेशिक रोजगारीको नाममा दर्जनौँ व्यक्तिलाई ठगी गर्ने पक्राउ
काठमाडौँ, १८ माघ । कतारलगायत खाडी मुलुकमा आकर्षक तलब सुविधा, खाने तथा बस्ने व्यवस्थासमेत छ भनी ठगी गर्ने कार्यमा संलग्न एक व्यक्तिलाई प्रहरीले पक्राउ गरेको छ ।
प्रहरीको केन्द्रीय अनुसन्धान ब्युरोको टोलीले धनुषा जिल्ला मिथिलेश्वर गाविस घर भई हाल ललितपुर नकबहिल बस्ने अमन भन्ने मोहम्मद अजमत अली साहलाई पक्राउ गरेको हो । उनले विभिन्न कम्पनीको नक्कली मागपत्र देखाई रोजगारीमा पठाइदिन्छु भन्दै प्रत्येक पीडितसँग राहदानी लिई प्रतिव्यक्ति रु एक लाख १० हजारदेखि रु दुई लाख सम्मको रकम उठाई ठगी गर्दै आएको ब्यूरोले जनाएको छ ।
कुनै आधिकारिक वैदेशिक रोजगार व्यवसायी तथा प्रतिनिधिसमेत नरहेका साहविरुद्ध हालसम्म ८७ जना पीडितले ब्युरोमा जाहेरी दर्खास्त दिइसकेका छन् । साहको डेरा कोठाबाट तीन थान भारतीय राहदानी र १७७ थान नेपाली नागरिकको राहदानीसमेत बरामद भएको प्रहरीले जनाएको छ ।
पछिल्लो आठ÷नौ महिनामाको अवधिमै पीडितहरूकै नामबाट सिम कार्ड निकाली १५ वटाभन्दा बढी मोबाइलको सिम प्रयोग गरेको ब्यूरोले जनाएको छ ।
गैँडाको खागसहित पक्राउ
ललितपुर देवीचौर–७ देउराली बस्ने वर्षीय समिर वाइबा र काभ्रेपलाञ्चोक कानपुर बस्ने नीरन लामालाई गैँडाको खागसहित प्रहरीले पक्राउ गरेको छ ।
गैँडाको खाग ओसार–पसार तथा खरिद–बिक्री भइरहेको भन्ने विशेष सूचनाका आधारमा सोमबार केन्द्रीय अनुसन्धान ब्युरोबाट खटिएको प्रहरी टोलीले भक्तपुर मध्यपुर ठिमी नगरपालिका, कौशलटारबाट गैँडाको एक थान खागसहित पक्राउ गरेको हो ।
थप अनुसन्धान एवम् आवश्यक कानुनी कारबाहीका लागि ब्युरोले जिल्ला वन कार्यालय भक्तपुर पठाएको छ । रासस