म्याग्दी, १६ कात्तिक । दरवाङ र देवीस्थान गाविसको सिमानामा पर्ने म्याग्दी नदीमा पक्की मोटरेबल पुल बनेपछि जिल्लाको पश्चिमी क्षेत्रका नौ गाविस सिधा सडक सञ्जालसँग जोडिएका छन् ।

म्याग्दी नदीमा पुल नहुँदा दरवाङ माथिका गाविसमा यसअघि सडक निर्माण भए पनि यातायात सुविधा थिएन । सडक डिभिजन कार्यालय बागलुङले रु छ करोडको लागतमा निर्माण गरेको पुल आइतबारदेखि औपचारिक रुपमा सञ्चालनमा आएको हो । ४६.२० मिटर लामो मोटरेबल पुल सञ्चालनमा आएपछि सदरमुकाम बेनीदेखि देवीस्थान, ताकम, मुना, लुलाङ, गुर्जा, मुदी, निस्कोट, रुम र ओखरबोट गाविसका बासिन्दा लाभान्वित भएका छन् ।

उक्त मोटरेबल पुलले बागलुङको बोङ्गादोभान र लामेला तमान गाविस पनि सिधा सडक सञ्जालमा जोडिएका म्याग्दी उद्योग वाणिज्य सङ्घ दरवाङ एकाइका सभापति मोतिराज गौतमले बताउनुभयो ।

म्याग्दी खोलामा बनेको पुल सञ्चालनमा आएपछि सदरमुकाम बेनीदेखि दरवाङ हुँदै ताकम र बिमको नरालेसम्म सिधा यातायात सेवा सुरु भएको छ ।

ताकमका लागि बिहान ८ बजे र नरालेका लागि ९ बजे माइक्रोबस छुटाउने म्याग्दी जिप तथा बस सञ्चालक समितिले जनाएको छ । समितिका अनुसार ताकम र नरालेबाट पनि सोही समयमा एक एकवटा गाडी छुट्नेछन् । इन्धन सङ्कटको समस्या सुल्झिएपछि बेलुकाको समयमा पनि गाडी छुटाउने समितिको योजना छ । रासस