दशवर्षीय कृषि विकास रणनीतिक योजना
काठमाडौँ, ४ मङ्सिर । कृषि क्षेत्रको समग्र विकास गर्ने उद्देश्यले कृषि विकास मन्त्रालयले कृषि विकास रणनीतिक योजना कार्यान्वयनमा ल्याएको छ ।
दशवर्षीय कार्ययोजना र मार्गचित्रसहित कृषिको विगत तथा वर्तमानको कामको समीक्षामा आधारित २० वर्षीय रणनीतिक योजना कृषि विकासमन्त्री हरिबोल गजुरेलले ललितपुरमा आज आयोजित कार्यक्रममा सार्वजनिक गर्नुभएको हो । आर्थिक वृद्धिलाई गति दिने, कृषकको जीवनस्तर माथि उठाउने, खाद्य तथा पोषण सुरक्षामा योगदान दिने खाद्यसम्प्रुभता उन्मुख बनाउने तथा कृषकलाई आत्मनिर्भर, प्रतिस्पर्धी र समावेशी गराउने सो योजनाको दूरदृष्टि रहेको छ ।
सो अवसरमा मन्त्री गजुरेलले कृषिको आधुनिकीकरण, व्यावसायीकरण र औद्योगीकरण गर्नुपर्ने, साना किसानलाई आधुनिक कृषि प्रणालीसँग जोड्नुपर्ने तथा सरकारी तथा नीति क्षेत्रको समवन्वयमा कृषिलाई रोजगारमूलक बनाउनुपर्नेमा जोड दिनुभयो ।
व्यवस्थापका–संसद्, कृषि तथा जलस्रोत समितिका सभापति गगनकुमार थापाले यो रणनीतिक योजना हाम्रा लागि महत्वपूर्ण आधार भएको बताउँदै कृषि क्षेत्रको दिगो विकास गरी जनतालाई आत्मनिर्भर बनाउनुपर्नेमा जोड दिनुभयो । पूर्वमन्त्री गणेश साहले कृषकलाई अन्नदाताका रुपमा सम्मान नगरेसम्म कृषि विकास नहुने बताउनुभयो ।
एसियाली विकास बैंकका देशीय निर्देशक केनिथी योको यामाले नेपाल जस्तो विकासोन्मुख मुलुकका लागि यो रणनीतिक योजनाले कृषि विकासमा ठूलो परिवर्तन ल्याउने विचार व्यक्त गर्नुभयो । रासस