खतरामा प्रजातन्त्र (व्यङ्ग)

योगीशकृष्ण : मित्रवर बन्धु भृकटी खुम्च्याउँदै सोचमग्न थियो ।

सोधेँ, “बन्धु ,दिमागमा कुनै नया विचार उत्पन्न भयो कि कसो ”

बन्धुको मुखमुद्रा झन कठोर भयो,“मुलुक यस्तो अवस्थामा छ,  तिमी जिस्किने हो यस्तो बेला ।”

म पनि गम्भीर भएँ । मुलुकको अवस्थाको कुरा हो । एउटा उखान सुनाइदिउँ कि जस्तो लागेको थियो । उसको गम्भीर मुद्रा देखेर आँट आएन ।मैले सोधेँ,“ मुलुकमा सब ठिक ठाक छ । भ्रष्टाचार घटेको छैन, जनता दुखी नै छन् , महङ्गी बढिरहेकै छ्, भोका युवा विदेश पलायन भइरहेकै छन् , चेलीबेटी बेचविखनमा कमी आएको छैन, कालोबजारी र तस्करको काम राम्रै चलिरहेको छ । अन्याय यथावत छ । अनि मुलुकमा चिन्ता गर्नु पर्ने कुरा के छ र ?।

उसले जबाफ दियो ,“प्रजातन्त्र खतरामा छ ।”

मैले सान्तवना दिएँ “यार, यो त शेरबहादुर देउवाले बोलेको कुरा हो ।”

उसको गम्भीरतामा कुनै फरक आएन।“देशको पूर्वप्रधानमन्त्री, सबैभन्दा ठूलो दलको नेताले बोलेको कुरा हो,त्यसैले प्रजातन्त्र खतरा भएकोले म चिन्तित छु ।”

अझै  पनि मैले उसलाई सामान्य बनाउन खोजेँ,“नेताले बोलेको कुरालाई गम्भीरतपूर्वक लिने हो र । उखान टुक्का झैँ मान्नु पर्छ, जसको हामीलाई बानी परिसकेको छ ।”

ऊ उत्तिकै गम्भीर रहेपछि म पनि गम्भीर भएँ । देउवाजी केही समयअघि सपत्नी भारत भ्रमणमा जानु भएपछि उहाँलाई संभवतः उहाँलाई ज्ञान भयो–प्रजातन्त्र खतरामा छ । भारत ज्ञानीहरुको देश हो । एक से एक ज्ञानी त्याहाँ बस्छन् । केही सन्त किसिमका ज्ञानी त अझ फौजदारी अपराधमा कारागारभित्र बसेर आफ्नो ज्ञान बाँढने गर्छन् । जो ज्ञानी बाँकी छन् ती सत्ता चलाउँछन्, दल चलाउँछन् । नेपालका कैयन् नेतालाई भारतले बोलाएर ज्ञान दियो –तिमीहरुको संविधान प्रजातान्त्रिक छैन । प्रजातान्त्रिक भएको भए भारतीयलाई प्रधानमन्त्रीलगायत अन्य महत्पूर्ण पदमा नियुक्त हुने अधिकार खोइ त । ती नेतलो बुझे संविधान अपूरो छ । यसै गरी यस्तै कुनै ज्ञानीले देउवाजीलाई ज्ञान दियो होला,“देखिए, नेपालमे प्रजातन्त्रके उपर खतरा है।”

देउवाजीले सदावहार मुस्कान छर्दै पत्नीलाई भने हुनन् “रानी साहेब, ल हेर्नुस्, प्रजातन्त्र खतरामा पो रहेछ ।”

मेरो तर्क बन्धुलाई मन परेन“देउवाले किन प्रजातन्त्र खतरामा छ भन्नुको कारण के हो ?”

भारत प्रजातन्त्र भएको मुलुक हो । उसले बेलायतको दासत्व भोगेको छ । उसको प्रजातन्त्र दासत्वमा आधारित छ । पाकिस्तान, उसैले बनाएको बङ्गलादेश, श्रीलङ्का, भुटान र आफूभित्र गाभेको सिक्किम सबैले उसको प्रजातन्त्र बुझेका छन् । चाहन्छ–नेपालले पनि उसको प्रजातन्त्र बुझोस् । त्यसैले देउवाले बुझे नेपालको प्रजातन्त्र खतरामा छ ।

सोचमग्न बन्धुलाई छाडेर म हिँडे ।

प्रतिक्रियाका लागि yogishkrishna81@gmail.com  वा editor@nepalekhabar.com