राष्ट्रपतिसमक्ष मानवअधिकार आयोगको वार्षिक प्रतिवेदन पेस
काठमाडौँ, २९ पुस । राष्ट्रपति विद्यादेवी भण्डारीसमक्ष राष्ट्रिय मानवअधिकार आयोगको आर्थिक वर्ष २०७२÷०७३ को वार्षिक प्रतिवेदन आज पेस गरिएको छ ।
राष्ट्रपति कार्यालय शीतल निवासमा आयोजित एक समारोहबीच आयोगका अध्यक्ष अनुपराज शर्माले सो प्रतिवेदन राष्ट्रपतिसमक्ष पेस गर्नुभएको राष्ट्रपति कार्यालयका प्रवक्ता कुलप्रसाद चुडालले जारी गर्नुभएको विज्ञप्तिमा उल्लेख छ ।
प्रतिवेदन ग्रहण गरेपछि राष्ट्रपति भण्डारीले आयोगको प्रतिवेदनलाई प्रभावकारी रुपमा कार्यान्वयन गर्नुपर्नेमा जोड दिनुभएकोे आयोगका प्रवक्ता मोहना अन्सारीले जानकारी दिनुभयो ।
प्रवक्ता अन्सारीले भन्नुभयो, “राष्ट्रपतिले प्रतिवेदनउपर संसद्मा छलफल गर्नुपर्ने बताउँदै यसो हुनसकेमा मानवअधिकार उल्लङ्घनको घटनामा कमी आउने धारणा राख्नुभयो ।”
यसपटकको प्रतिवेदनमा द्वन्द्वकालदेखिका केही मुद्दा टुङ्ग्याइएको अन्सारीले जानकारी दिनुभयो । मानवअधिकारका उल्लङ्घनमा दोषी देखिएकालाई बढुवा, नियुक्तिलगायत रोक्नुपर्नेमा प्रतिवेदनले जोड दिएको छ । रासस