काठमाडौँबाहिर तीन ठाउँमा वैदेशिक रोजगार सेवा केन्द्र खोल्ने तयारी
सीता शर्मा / काठमाडौँ, वैशाख २५ गते । वैदेशिक रोजगार विभागले काठमाडौँबाहेक अन्य तीन ठाउँमा सेवा केन्द्र सञ्चालन गर्ने तयारी गरेको छ ।
वैदेशिक रोजगारीमा जाने व्यक्ति सानो कामका पनि राजधानीस्थित विभागमा आउनुपर्ने बाध्यतालाई मध्यनजर गरी विभागले आउँदो साउनदेखि राजधानीबाहिर तीन ठाउँमा सेवा केन्द्र सञ्चालन गर्ने तयारी गरेको हो । विभागका अनुसार बाँकेको नेपालगञ्ज, धनुषाको
ढल्केवर र कास्कीको पोखरा वा रूपन्देहीको बुटवलमध्ये कुनै एक ठाउँ विभागले सेवा केन्द्र सञ्चालन गर्न लागेको हो ।
विभागका महानिर्देशक विश्वराज पाण्डेले वैदेशिक रोजगारीमा बढी जाने क्षेत्र र विदेश जाने व्यक्तिलाई पायक पर्ने ठाउँलाई लक्षित गरेर विभागको सेवा केन्द्र खोल्ने तयारी गरेको जानकारी गराउनुभयो । उहाँले विभागले ती तीन ठाउँमा सेवा केन्द्र खोलेपछि भने विदेश
जाने व्यक्तिले आफ्नो पायक पर्ने ठाउँबाट सेवा लिन सक्ने बताउनुभयो ।
विभागका महानिर्देशक पाण्डेले ती ठाउँमा सेवा केन्द्र सञ्चालन गरेपछि विभागको ताहचलस्थित श्रम कार्यालयमा हुने चापमा धेरै कमी आउने र सेवाग्राहीलाई पनि धेरै राहत पुग्ने विश्वास व्यक्त गर्नुभयो ।
राजधानीबाहिर सेवा केन्द्र स्थापना गरेर सेवा दिनका लागि आवश्यक जनशक्ति र पूर्वाधारका विषयमा आन्तरिक गृहकार्य भइरहेको पनि उहाँको भनाइ छ । विभागका अनुसार सेवा केन्द्रबाट वैदेशिक रोजगारीमा जानेलाई विभागबाट दिइने परामर्शदेखि नयाँ श्रम स्वीकृति,
पुनः स्वीकृतिका सेवा उपलब्ध गराउने गरी तयारी भइरहेको छ ।
त्यसैगरी, विदेशमा कार्यरत कामदारले आउँदो साउन महिनादेखि सम्बन्धित देशको दूतावासबाटै पुनः स्वीकृति लिन पाउने भएका छन् ।
विदेशस्थित नेपाली नियोगले धेरै पहिलेदेखि नै पुनः स्वीकृति दिन सकिने भन्ने विषयका कुरा उठाउँदै आएको भन्दै महानिर्देशक पाण्डेले नियोगकै सुझावका आधारमा नयाँ आर्थिक वर्षदेखि राजदूतावासबाटै पुनः श्रमस्वीकृति दिने तयारी भइरहेको छ भन्नुभयो । नेपाली
कामदार बढी भएका मलेसिया, साउदी अरब, कतार, कुवेतका दूतावासबाट एकै पटक श्रमस्वीकृति दिन सुरु गरिने भनिएको तर एकै पटक सम्भव हुने नहुने भन्ने विषयमा अहिलेसम्म टुँगो नलागेको उहाँको भनाइ छ ।
दूतावासबाट श्रम स्वीकृतिको सेवा दिन थालेपछि बिदामा नेपाल आउने कामदारले काठमाडौँमा पुनः श्रम स्वीकृति लिनु पर्दैन् । कामदारले गन्तव्य मुलुकमा रहेको नेपाली दूतावासबाटै पुनः श्रमस्वीकृति लिन सक्नेछन् । अहिले काठमाडौँको ताहचलमा रहेको विभागको
श्रम कार्यालयबाट मात्रै नयाँ र पुनः श्रम स्वीकृति लिन पाउने व्यवस्था छ ।