गुणस्तरीय बाली उत्पादनमा जोड
धनगढी, वैशाख २२ गते । प्रधानमन्त्री कृषि आधुनिकीकरण परियोजनाअन्तर्गत सञ्चालित ‘जोन‘ र ‘सुपरजोन‘ कार्यक्रम मार्फत भइरहेका विभिन्न खेतीको उत्पादन गुणस्तरीय हुनुपर्नेमा जोड दिइएको छ ।
खाद्य प्रविधि तथा गुण नियन्त्रण विभागले शुक्रबार यहाँ गरेको अन्तक्र्रिया कार्यक्रममा सहभागी उद्योगी व्यवसायीले बजार र उद्योगीको माग अनुसारको खाद्यान्न खेती गर्न कृषकलाई प्रोत्साहित गर्नुपर्नेमा जोड दिनुभयो ।
जोन सुपर जोन कार्यक्रमअन्तर्गत मसिनो धान, मकै, चिउरा बनाउन गुणस्तरीय धान एंव गहुँको उत्पादन तथा यसको विस्तारमा ध्यान पु¥याउन जरुरी रहेको सुझाव उनीहरुको छ ।
सो अवसरमा खाद्य प्रविधि तथा गुण नियन्त्रण विभागका महानिर्देशक सञ्जीवकुमार कर्णले उपभोक्ताको माग बमोजिमका खाद्यान्न प्रशोधन गरेर खाद्यका विविध परिकार बनाउने तर्फ उद्योगीको ध्यान जान सकेमा जोन र सुपर जोन कार्यक्रमले राखेको लक्ष्य पूरा हुनसक्ने बताउनुभयो ।
विभागका प्रवक्ता पूर्णचन्द्र वस्तीले कृषि उत्पादनसँग खाद्य प्रशोधनका उद्योगलाई कसरी जोड्न सकिन्छ भन्ने उद्देश्यले सुझाव लिन कार्यक्रम गरिएको जानकारी दिनुभयो ।
क्षेत्रीय खाद्य प्रविधि तथा गुण नियन्त्रण कार्यालय धनगढीका प्रमुख सुमन धिताल, नेपाल कृषि अनुसन्धान परिषद(नार्क)का क्षेत्रीय निर्देशक केशवप्रसाद श्रेष्ठ लगायतले खाद्य प्रशोधन लगायतका विषयमाथि प्रकाश पार्नुभयो ।
प्रदेश नं ७ मा गहुँमा आधारित ९४ र धानमा आधारित ६८ वटा उद्योगले खाद्य प्रशोधन सम्बन्धी काम गरिरहेको जनाइएको छ ।
परियोजनाअन्तर्गत प्रदेश न ं७ को कैलाली जिल्लामा एक हजार २२५ हेक्टरमा गहुँको सुपर जोन, पाँच सय हेक्टरमा तेलहन जोन र पाँच सय हेक्टरमा धानको जोन तथा कञ्चनपुरमा पाँच सय हेक्टरमा धानको जोन कार्यक्रम सञ्चालनमा छन् ।
दुई वर्षअघि सञ्चालनमा आएको यो कार्यक्रम अन्तर्गत गरिने गहुँ, धान र तेलहन बालीको खेतीमा बीउ, मल र कृषियन्त्रमा ५० प्रतिशत अनुदान, साना सिँचाइ र उत्पादन उपरान्तको प्रविधिमा ८५ प्रतिशत अनुदानको सुविधा सम्बन्धित कृषकले पाउँदै आएका छन् ।
यसैबीच खाद्य प्रविधि तथा गुण नियन्त्रण विभागले गएको चैत महिनादेखि लागू भएको प्रशोधित पिउने पानी उत्पादन मापदण्ड सम्बन्धी निर्देशिका २०७४ कार्यान्वयन गर्ने सवालमा सरोकारवालासँग अन्तक्र्रिया समेत गरेको छ । रासस