सवारीधनी लाँदैनन् ब्ल्यु बुक र मार्ग अनुमतिपत्र
काठमाडौँ, मङ्सिर ६ गते । सडक नियम उल्लङ्घन गरेर कारवाहीमा परेका धेरै सवारीधनीले सवारीधनी प्रमाणपत्र (ब्ल्यु बुक) र मार्ग अनुमतिपत्र लैजाने गरेका छैनन् ।
एकान्तकुनास्थित यातायात व्यवस्था कार्यालय सानाठूला सवारी शाखामा अहिले पनि झण्डै पाँच वर्ष पहिलेदेखिका कागजात बाँकी छन् । झण्डै छ हजार वटा ब्ल्यु बुक र मार्ग अनुमतिपत्रका कागजात अहिले पनि पटके शाखामा छन् । पछिल्लो पाँच वर्षयता चारपाङ्ग्रे सवारीको तीन हजार ९६४ वटा कागजात सवारीधनीले लगेका छन् । धेरै समय राखेर मात्रै लिन आउने गरेको शाखामा कार्यरत सनिल श्रेष्ठले बताउनुभयो । उहाँले भन्नुभयो, “कागजात थुप्रिएर राख्ने ठाउँ नै छैन ।”
साउनदेखि यता ४३१ वटा कागजात सवारीधनीले लगेका छन् । पहिले व्यवसायी सङ्घले कागजात लाने गरेकामा अहिले सवारीधनी आफैँले लान्छन् । सडक नियम उल्लङ्घन गर्दा ट्राफिक प्रहरीले एक हजारसम्म आफैँ चिट काट्ने र त्योभन्दा बढी हुँदा यातायात व्यवस्था कार्यालयमा सिफारिश गर्दछ । कार्यालयले तोकिएको जरिवाना रकम तिरेको रसिद हेरेर ती कागजात फिर्ता पठाउने गरेको कार्यालयका प्रमुख वसन्तप्रसाद पन्थीले बताउनुभयो । उहाँले भन्नुभयो, “यहाँ कागजात किन लिन आउँदैनन् भन्ने हामीलाई थाहा हुँदैन ।” रासस