‘सेवा समूह क्लष्टर’ पुनर्लेखन गर्न निर्देशन
काठमाडौँ, वैशाख २६ गते । प्रतिनिधिसभाको राज्य व्यवस्था तथा सुशासन समितिले ‘सङ्घीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक’ मा सेवा समूहको क्लष्टर स्पष्ट नभएको भन्दै पुनर्लेखन गर्न निर्देशन दिएको छ ।
समितिको आजको बैठकमा सांसदहरुले विधेयको दफा ४ मा रहेको ‘सङ्घीय निजामती सेवाको गठन’अन्तर्गतका सेवा समूहसम्बन्धी प्रावधान स्पष्ट नभएकाले आवश्यक सुधार गर्न सुझाव दिनुभएको थियो । समिति सभापति शशि श्रेष्ठले सोे दफाका केही उपदफा स्पष्ट नभएको भन्दै पुनर्लेखन गरी ल्याउन सङ्घीय मामिला तथा सामान्य प्रशासन मन्त्रालयलाई निर्देशन दिनुभयो ।
बैठकमा सांसदहरुले राख्नुभएका जिज्ञासका सम्बन्धमा सामान्य प्रशासनमन्त्री लालबाबु पण्डित र सचिव यादवप्रसाद कोइरालाले विधेयकका बारेमा स्पष्ट पार्नुभएको थियो । सांसदहरुले विभिन्न दफामा संशोधनसमेत हाल्नुभएको छ । सांसदहरु दीलेन्द्रप्रसाद बडु, पम्फा भुसाल, विजय सुब्बा, यशोदा सुवेदी, अमरेशकुमार सिंह, नवराज सिलवाल, गङ्गा चौधरी सत्गौवा लगायतले विधेयकमा कर्मचारीको विशिष्टिकृत सेवाका बारेमा आवश्यक व्यवस्था गर्न, सरुवा, बढुवा र विदेश भ्रमणमा समानरुपमा हुने प्रणालीबद्ध व्यवस्था गर्न, व्यक्ति हेरेर कानून बनाउने परम्पराको अन्त्य गर्न, सेवाग्राहीप्रति उत्तरदायी र जवाफदेही हुनुपर्नेलगायतका व्यवस्था गर्न सुझाव दिनुभएको थियो ।