गरीब नेपालीको राम्रो भविष्य बन्नेमा भवनबाट सहयोग पुग्ने –सांसद भुसाल
ललितपुर, जेठ १९ गते । यहाँस्थित महेन्द्र आदर्श विद्याश्रमलाई चीन सरकारद्वारा निर्मित दशकोठेयुक्त भवन एक समारोहकाबीच हस्तान्तरण गरेको छ । चिनियाँ वाल दिवसका अवसरमा चीनमा सञ्चालित गरीबी उन्मूलन नामक संस्था (सिएफपिए)ले हस्तान्तरण गरेको उक्त भवनलाई सांसद पम्फा भुसालले उद्घाटन गर्नुभएको थियो । उक्त सामुदायिक विद्यालयमा वि.सं २०७२ सालको भूकम्पपछि कक्षाकोठा अभाव भइरहँदा उक्त सहयोग भएको हो ।
भवन उद्घाटन गर्नुहुँदै सांसद पम्फा भुसालले श्रमजीवी जनताको छोराछोरी अध्ययन गर्ने उक्त विद्यालयलाई नेपाल र चीनको जनताबीचको मित्रताको कडी भएको उल्लेख गर्नुभयो । उहाँले नयाँ नेपाल निर्माण गर्न शिक्षा क्षेत्रको प्रमुख योगदान हुने चर्चा गर्नुहुँदै गरीब नेपालीको राम्रो भविष्य बन्नेमा उक्त भवनबाट सहयोग पुगेको बताउनुभयो ।
पूर्वमन्त्री पनि रहनुभएकी सांसद भुसालले उक्त विद्यालय प्राङ्गणमा नेपाल सरकारबाट प्राप्त सहयोगबाट अर्काे भवन निर्माण भइरहेको जानकारी गराउनुभयो । विद्यालय प्रधानाध्यापक कृष्णदत्त जोशीले सिएफपिए संस्थाका जङ च्याङ ग्व र चाउ पी छ्याङले उक्त भवन निर्माणमा रु दुई करोड नौ लाख ५० हजार सहयोग गरेकोे जानकारी दिनुभयो ।
ललितपुर महानगरपालिका, शिक्षा शाखाका उपसचिव महेन्द्रबहादुर क्षत्रीले विद्यार्थीका लागि विद्यालय भवन मात्रै नभई शिक्षाको गुणस्तरमा पनि उत्तिकै सुधार हुनुपर्नेमा जोड दिनुभयो ।
सिएफपिएका अध्यक्ष चाउले गत वर्ष सो विद्यालयमा अध्ययनरत विद्यार्थीको आर्थिक अवस्थालाई ध्यानमा राखी ३०० झोला र १८ कम्प्युटर वितरण गरिएको जानकारी दिनुभयो ।
कार्यक्रममा कलेजका पूर्वप्रमुख रामप्रसाद पाठक र अनिरुद्ध रिसाललाई सम्मान गरिनाका साथै विद्यालयका इलेक्ट्रिसियन मङ्गल महर्जनलाई रुपियाँ एक लाखसहित सम्मान गरिएको थियो ।
सफा सुनौलो नेपालका पूर्वअध्यक्ष राजेश हमालले भवन अभावका कारण पठनपाठनमा समस्या भएकाले भवन निर्माण गर्न आफूले सक्दो सहयोग गरेको जानकारी गराउनुभयो ।
ललितपुर महानगरपालिकाका १५ वडाका अध्यक्ष सुर्दशन मिश्रले दुई देशबीचको सम्बन्ध प्रगाढ बनाउन भवनले अह्म भूमिका खेलेको बताउनुभयो । कार्यक्रममा उक्त विद्यालयले विभिन्न सांस्कृतिक गतिविधिहरु प्रस्ततु गरेको थियो ।