सार्वजनिक सम्पत्तिको सुरक्षा मुख्य चुनौती : कार्यवहाक प्रधानमन्त्री
काठमाडौँ, ७ भदौ । कार्यवाहक प्रधानमन्त्री ईश्वर पोखरेलले सार्वजनिक जग्गा अतिक्रमण गर्नेबारे हामी भित्रै समस्या रहेको बताएका छन् । आफ्नै निर्वाचन क्षेत्र काठमाडौं क्षेत्र नम्बर ५ स्थित प्रदेश नम्बर ३ सरकारले बनाएको लम्टाङ्गिन पार्क शनिबार उद्घाटन गर्दै पोखरेलले सार्वजनिक जग्गा आफ्नो बनाउने मनस्थिति आम मानिसले त्याग्नुपर्ने बताए ।
काठमाडौं उपत्यका लगायत शहरी क्षेत्रभित्र विभिन्न स्थानमा खाली जग्गा राख्नुपर्ने आवश्यक्ता रहेको उपप्रधानमन्त्री एवं रक्षामन्त्रीसमेत रहेका पोखरेलले बताए । ‘भूकम्पमा हामीले देख्यौँ । मृत्यु हुनेहरु त भैगए, बाच्नेहरुको लागि बस्न सुरक्षित स्थलको समेत अभाव देखियो । खाली जग्गा आवश्यक छ, अझ सार्वजनिक जग्गालाई संरक्षण गर्ने र खुला नै राख्ने काम गर्नुपर्छ’ उनले भने । विभिन्न शुभकार्यमा उत्सव मनाउँदै गर्दा बृक्षरोपण पनि सँगसँगै गर्न सके हरियालीले वातावरण स्वच्छ हुने उनले बताए ।
कार्यक्रममा प्रदेश नम्बर ३ का सांसद नारायण सिलवालले बर्तमान कम्युनिस्ट नेतृत्वको सरकारले गतिशिलता हासिल गर्न थालिसकेको बताए । ‘मुलुक संघीयतामा गइसकेपछि विभिन्न संरचना तयार गर्नु थियो, कानुन बनाउनु थियो । अबका वर्ष भने गतवर्ष भन्दा बढि विकास हुनेछ । बढि आयोजना समयमै सम्पन्न हुनेछ’ सिलवालले भने । प्रदेश नम्बर ३ को प्रदेशसभाले स्थायी मुकाम र प्रदेशको नाम तोक्ने विषयलाई अबको दिनमा प्राथमिकता दिन लागिपरेको उनले बताए । कार्यवाहक प्रधानमन्त्री पोखरेलको निर्देशन तथा प्रदेश सांसद सिलवालको सक्रियतामा काठमाडौं प्रतिनिधिसभा निर्वाचन क्षेत्र ५ को प्रदेशसभा क्षेत्र एकमा सार्वजनिक पार्क व्यवस्थापन, निर्माण, सडक विद्युत निर्माण तथा धोवीखोला करिडोर कालोपत्रे गर्ने क्रम अघि बढेको सांसद सिलवालका स्वकीय सचिव लक्ष्मण शर्माले बताए ।
कार्यक्रमममा काठमाडौं महानगरपालिकाका मेयर विद्यासुन्दर शाक्यले महानगरभित्र विद्युतीय सवारीसाधन चाडै सञ्चालनमा आउन लागेको जानकारी दिए ।
संघीय सरकारले ३ अर्ब, प्रदेश सरकारले ३० करोड विद्युतीय बस सञ्चालनको लागि रकम दिनुभएको छ । महानगरपालिकाको पनि केही बजेट त्यहाँ हालेर हामी विद्युतीय सवारी साधन छिट्टै सञ्चालनमा ल्याउदैछौँ’ उनले भने । आफ्नो घरअगाडिको बाटोमा हिलो जम्दैमा भ्रम सिर्जना गर्ने प्रवृत्ति बढेको भन्दै मेयर शाक्यले चिन्ता व्यक्त गरे । ‘अहिले काठमाडौं महानगरपालिका भित्रका सबै वडाध्यक्ष एकअर्काको प्रतिस्पर्धामा हुनुहुन्छ, वडा नम्बर ४ का अध्यक्ष मोहनबहादुर बिष्टले निकै राम्रो काम गर्नुभएको छ । सार्वजनिक जग्गा संरक्षणमा राम्रो भूमिका खेल्नुभएको छ’ मेयर शाक्यले भने ।