बुधबारदेखि मेडिकल सञ्चालकविरुद्ध ठगी मुद्दा चलाउने

काठमाडौं, मंसिर १० । मेडिकल कलेजका सञ्चालकहरुले अतिरिक्त शूल्क फिर्ता गर्न नमानेपछि बुधबारदेखि विद्यार्थीसँग उजुरी लिएर ठगी मुद्दामा कारबाही गर्ने निर्णय सरकारले गरेको छ ।

मंगलबार गृहमन्त्री रामबहादुर थापा, शिक्षामन्त्री गिरिराजमणि पोखरेल लगायतको बैठकले यस्तो निर्णय गरेको हो । सरकारले सोमबार मेडिकल कलेज सञ्चालकलाई शुल्क फिर्ता गर्न २४ घन्टाको समय दिएको थियो । उनीहरुले नमानेपछि सरकार कानूनी कारबाहीमा अघि बढ्ने निर्णय गरेको हो ।

सरकारले यसअघि मेडिकल कलेज सञ्चालकलाई सुरुमा एक महिना तथा पछि १५ दिनको अल्टिमेटम दिएको थियो । राष्ट्रिय सतर्कता केन्द्रले गरेको छानबिनमा तीन वर्षमा निजी मेडिकल कलेजहरुले तीन खर्ब ठगी गरेको ठहर गरेको छ ।