उपनिर्वाचन २०७६ : ३९ स्थानको मत परिणाम सार्वजनिक; काश्की–२ मा नेकपाकी विद्या भट्टराई विजयी
काठमाडौँ, मङ्सिर १५ गते । बिभिन्न ५२ पदका लागि शनिबार भएको उपनिर्वाचन २०७६ को हालसम्म ३९ स्थानीय तहका वडाध्यक्षको अन्तिम मतपरिणाम सार्वजनिक भएको छ ।
निर्वाचन आयोगका अनुसार नेपाल कम्युनिष्ट पार्टी (नेकपा) का २२, नेपाली काँग्रेसका ११, राष्ट्रिय जनता पार्टी (नेपाल)का तीन र समाजवादी पार्टीका उम्मेदवारले तीन स्थानमा विजय प्राप्त गरेका छन् ।
कास्की जिल्ला निर्वाचन क्षेत्र नं २ प्रतिनिधिसभा सदस्य, भक्तपुरको प्रदेशसभा सदस्य निर्वाचन क्षेत्र नं १ (क), धरान उपमहानगरपालिका प्रमुख, महोत्तरीको पिपरा गाउँपालिकाको अध्यक्ष पदको शनिबार भएको निर्वाचनको मतगणना कार्य भइरहेको छ ।
प्रतिनिधिसभा सदस्य बागलुङ निर्वाचन क्षेत्र नं २ (ख) र दाङ प्रदेशसभा सदस्य क्षेत्र नं ३ (ख) को मतगणना आज शुरु हुने सम्बन्धित मुख्य निर्वाचन अधिकृतको कार्यालयबाट थाहाभएको छ ।
काश्की–२ मा नेकपाकी विद्या भट्टराई विजयी
प्रतिनिधिसभा सदस्यका लागि काश्की–२ मा भएको निर्वाचनमा नेपाल कम्युनिष्ट पार्टी (नेकपा) का उम्मेदवार विद्या भट्टराईको विजयी हुनुभएको छ ।
उहाँले कुल २४, ३९५ मत पाउनु भएको छ भने उहाँका निकटतम प्रतिद्वन्द्वी नेपाली काँग्रेसका खेमराज पौडेलले १५ हजार ९८४ मत पाउनु भएको छ । काश्कीको यो क्षेत्रमा ४५ हजार ५६३ मत खसेको थियो ।
जितसँगै भट्राईले आफू सो क्षेत्रको विकासमा समर्पित रहने बताउनुभयो । रासस