६० जिल्लामा टेलिकमको फोरजी; टेलिकमकाे फाेन नम्बर अब वेभसाइटबाटै पाउने
काठमाडौँ, पुस ६ गते । गत असोज १५ मा एकैपटक ३६ जिल्लामा फोरजी सेवा सुरु गरेको नेपाल टेलिकमले ६० जिल्लामा यसको विस्तार गरेको छ । टेलिकमले नौ सयभन्दा बढी साइट स्थापना गरी ६० जिल्लाका मुख्य सहर र नगरपालिकामा यो सेवा विस्तार गरेको जनाएको छ । योसँगै टेलिकम नेपालमा सबैभन्दा धेरै स्थानमा फोरजी नेटवर्क विस्तार गर्नेमा पहिलो बनेको कम्पनीले दाबी गरेको छ ।
नेपालमै पहिलोपटक २०७३ पुस १७ गते फोरजी सेवा सुरु गरेको कम्पनीले गत माघ २० गते नयाँ सम्झौता गर्दै फोरजी विस्तारलाई गति दिएको थियो । देशैभर फोरजी विस्तार गर्ने परियोजना अन्तर्गत अहिले तीव्ररूपमा नयाँ टावरमा यो सेवा जडान गर्ने काम भइरहेको कम्पनीका प्रबन्ध निर्देशक डिल्लीराम अधिकारीले जानकारी दिनुभयो । ‘खासगरी पूर्वाधार निर्माणमा निकै जटिलताका बीच पनि नियमितरूपमा सेवा विस्तारको काम भइरहेको छ’ उहाँले भन्नुभयो ‘फोरजी विस्तारको अहिलेसम्मको प्रगति हेर्दा टेलिकममा कुनै परियोजनामा यति छिटो काम भएको यो पहिलोपटक नै हो ।’
टेलिकमले करिब १९ अर्ब रुपियाँ लगानीमा ६५ लाख फोरजी ग्राहक थप गर्ने लक्ष्यसहित माघदेखि नेटवर्क विस्तारको परियोजना अगाडि बढाएको थियो । उक्त परियोजना अनुसार अहिलेसम्म हिमाली जिल्लाबाहेक प्रायः सबै जिल्लाका मुख्य स्थानमा फोरजी सेवा पुगेको कम्पनीले जनाएको छ ।
फोरजी परियोजना अन्तर्गत कम्पनीले चार हजार दुई सय टावरमा फोरजी प्रविधि जडान गर्ने लक्ष्य राखेको छ । त्यस्तै यसै परियोजना अन्तर्गत थप छ सय नयाँ टावर स्थापना गर्ने काम कम्पनीले अगाडि बढाएको छ । काम सुरु भएको फागुनदेखि यता कम्पनीले दुई सयओटा नयाँ टावर स्थापना गरिसकेको छ भने एक हजार पाँच सयभन्दा बढी टावरमा फोरजी प्रविधि जडान गरेर सेवा सञ्चालनमा ल्याएको छ । गत माघमा भएको सम्झौताअनुसार एक वर्षभित्र काम सम्पन्न गर्नुपर्ने भए पनि भौगोलिक जटिलता, मौसमको प्रतिकूलताका कारण कतिपय स्थानमा स्वभाविक रूपमा काम अगाडि बढ्न नसकेको प्रबन्ध निर्देशक अधिकारीको भनाइ छ । ‘यद्यपि अहिले नेटवर्क विस्तारमा ठूलो समूह परिचालन छ’ उहाँले भन्नुभयो ‘माघसम्ममा अझ धेरै टावरमा फोरजी जडान गर्नसक्छौँ ।’ उहाँका अनुसार अहिले प्रतिदुईघण्टामा हरेक नयाँ टावरमा फोरजी प्रविधि जडानको काम भइरहेको छ । कतिपय ठाउँमा योभन्दा कम समयमा नै फोरजी प्रविधि जडान गरिएको उहाँले जानकारी दिनुभयो । उहाँका अनुसार परियोजनामा तोकिएको लक्ष्यअनुसारका पूर्वाधार निर्माणका काम अगाडि बढाइनेछ ।
नेपाल टेलिकमले हाल ८ सय र १८ सय मेगाहर्ज ब्यान्डअन्तर्गत प्राप्त फ्रिक्वेन्सी प्रयोग गरेर फोरजी सेवा विस्तार गरिरहेको छ । फोरजी सेवा विस्तारका लागि कम्पनीले यसैलाई केन्द्रित गरेर व्यावसायिक योजनाका कार्यक्रम पनि समान रूपमा अगाडि बढाएको जनाएको छ । अहिले प्रयोगमा रहेको थ्रीजीभन्दा उच्च गतिको इन्टरनेट प्रयोग गर्नसकिने र खास गरी भिडियो कन्टेन्टका लागि फोरजी उपयोगी प्रविधि मानिन्छ ।
टेलिकमकाे फाेन नम्बर अब वेभसाइटबाटै पाउने
नेपाल टेलिकमको वेबसाइटबाटै आवश्यकताबमोजिम कुनै पनि व्यक्ति तथा संस्थाको स्थानीय टेलिफोन नम्बर थाहा पाउन सकिने भएको छ ।
थाहा नभएका तर सम्पर्क गर्नुपर्ने टेलिफोन नम्बर पत्ता लगाउन हालसम्म १९७ मा फोन गरेर सोध्नुपर्ने व्यवस्था रहेकामा अब कम्पनीको वेबसाइटबाट पनि हेर्न मिल्ने गरी सुविधा उपलब्ध गराइएको टेलिकमले विज्ञप्तिमार्फत जनाएको हो । नेपाल टेलिकमको वेब पेजमार्फत यस प्रकारको पिएसटीएन टेलिफोन सोधपुछ प्रणाली सञ्चालनमा ल्याइएको छ । त्यसका लागि कम्पनीको वेबसाइट https://www.ntc.net.np/pstn मा लगअन गर्नुपर्छ ।
त्यहाँ दिइएको ‘टेलिफोन इन्क्वाइरी’मा आफूलाई चाहिएको व्यक्ति वा संस्थाको नम्बर खोज्न सकिन्छ । व्यक्तिगत ग्राहकका हकमा व्यक्तिको नामका साथै ठेगाना र जिल्ला लेखेर नम्बर पत्ता लगाउन सकिन्छ । त्यसैगरी संस्थागत ग्राहकका हकमा कम्पनीको नाम, ठेगाना र जिल्लाअनुसार टेलिफोन नम्बर प्राप्त गर्न सकिन्छ ।
विगतमा पनि पिएसटीएन टेलिफोन नम्बर खोज्नका लागि कम्पनीको मुख्य वेब पेजमार्फत वेबमा आधारित इन्क्वायरी सिष्टम सञ्चालनमा रहेको थियो । हाल सोही सेवालाई पुनःपरिमार्जितरुपमा सञ्चालनमा ल्याइएको हो । कम्पनीका डाटा प्रयोगकर्ताको सङ्ख्यामा उल्लेख्य वृद्धि भएका कारणले गर्दा पनि ग्राहकलाई वैकल्पिकमाध्यमबाट बिनाझण्झट जुनसुकैबेला सेवा उपलब्ध गराउन यो व्यवस्था गरिएको कम्पनीले जनाएको छ ।