कोरोना संक्रमितको सम्पर्कमा आएकाहरूको कन्ट्याक्ट ट्रेसिङ ९० प्रतिशत सकियो
काठमाडौं, चैत २५ गते । कोरोना भाइरस (कोभिड– १९) संक्रमित नेपालीको सम्पर्कमा आएका व्यक्तिहरूको कन्ट्याक्ट ट्रेसिङ ९० प्रतिशत सम्पन्न भएको छ । स्वास्थ्य तथा जनसंख्या मन्त्रालयले आयोजना गरेको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले ९० प्रतिशत कन्ट्याक्ट ट्रेसिङ सकिएको जानकारी दिए ।
संक्रमणको जोखिम उच्च भएका जिल्लाहरू कैलाली, कञ्चनपुर, ऱ्यापिड डायगोनिस्टिक टेस्टमार्फत परीक्षण सुरु गरिएकोसमेत उनले बताए । जुम्ला र अछाममा पनि परीक्षणका लागि स्वाब लिने काम भइराखेको उनले बताए ।
गत शनिबार एकैदिन तीनजना कोभिड– १९ को संक्रमित भेटिएपछि मंगलबारसम्म कुनै पनि संक्रमित नभेटिएको देवकोटाले जानकारी दिए ।
शनिबारयता दुई सय ५५ जनाको परीक्षण गरिएको छ । शनिबारसम्म एक हजार चार सय ४१ जनाको परीक्षण गरिएको थियो । यस्तै मंगलबारसम्म एक हजार सात सय ९६ जनाको परीक्षण भएको प्रवक्ता देवकोटाले बताए । जसमध्ये नाैजनामा कोरोना भाइरस संक्रमण भेटिएको छ भने एकजना उपचारपछि घर फर्किसकेका छन् । प्रवक्ता देवकोटाले उपचाररत आठजनाको स्वास्थ्य अवस्था समान्य रहेकोसमेत बताए ।
काठमाडौं उपत्यकाभित्र १६ जना र काठमाडौंबाहिर ८४ जना आइसोलेसनमा रहेको र क्वारेन्टाइनमा नाै हजार दुई सय २८ जना रहेको प्रवक्ता देवकोटाले बताए । यस्तै रेडजोनमा मंगलबार १७ जना थपिएर एक सय ७२ पुगेको उनले बताए । यसबाहेक काठमाडौं उपत्यकाका विभिन्न स्थानमा रहेका ३५ व्यक्तिको नमुना संकलनसमेत भएको उनको भनाइ छ ।
वीरेन्द्र सैनिक अस्पतालको संयुक्त मेडिकल टोलिले सशस्त्र प्रहरी बल र नेपाल प्रहरीका अस्पतालहरूका २६ जना स्वास्थ्यकर्मीहरूलाई कोभिड– १९ सम्बन्धी तालिम दिने कार्य मंगलबार नै सकिएको उनले बताए ।
निजी स्वास्थ्य संस्थाका चिकित्सक तथा स्वास्थ्यकर्मीहरूलाई सरकारले आवश्यकताअनुसार परिचालन गरेर आ–आफ्नो तहअनुसार सुविधा दिने निर्णय गरेअनुसार काम अगाडि बढाइएको उनले जानकारी दिए ।