प्रधानमन्त्री ओली र नेकपा अध्यक्ष प्रचण्डबीच तीन घन्टा भेटवार्ता
काठमाडौँ , वैशाख ६ गते । प्रधानमन्त्री केपी शर्मा ओली र नेकपा अध्यक्ष पुष्पकमल दाहाल ‘प्रचण्ड’बीच शनिबार भेटवार्ता भएको छ । कोरोना भाइरसले सिर्जना गरेको जटिल स्थिति, ‘लकडाउन’लाई प्रभावकारी बनाउने विषय र बिचल्लीमा परेका नागरिकहरूलाई राहत दिने विषयमा छलफलका लागि नेकपा अध्यक्षसमेत रहेका प्रधानमन्त्री ओली र अर्का अध्यक्ष प्रचण्डबीच भेटवार्ता भएको हो ।
बालुवाटार स्रोतका अनुसार अध्यक्षद्वयबीच करिब तीन घन्टा प्रधानमन्त्रीनिवास बालुवाटारमा कुराकानी भएको थियो । ‘अध्यक्ष प्रचण्ड बिहान ११ बजे प्रधानमन्त्रीनिवास बालुवाटार आइपुग्नुभएको थियो,’ स्रोतले भन्यो, ‘प्रधानमन्त्रीसँगको कुराकानी दिउँसो २ बजेसम्म चलेको थियो ।’
राजदूत लीलामणि पौडेललाई चीनबाट फिर्ता बोलाउने प्रधानमन्त्री ओलीको निर्णय र कोरोना संक्रमण विस्तार हुन नदिन सहकार्यका लागि सर्वदलीय संयन्त्र गठन गर्नुपर्ने प्रचण्डको प्रस्तावले दुई शीर्ष नेताबीच सम्बन्ध चिसिएको विश्लेषण नेकपा वृत्तमा छ । यस्तो वेला पार्टीका दुई शीर्ष नेताबीच भएको तीन घन्टा लामो भेटवार्तापछि सम्बन्ध सुधार भएको अनुमान गरिएको छ ।