ट्रेसिङ र टेस्टिङ कार्यमा सहजीकरण गर्न टोली गठन
काठमाडाैं, बैशाख १२ गते । कोरोना भाइरस रोकथाम तथा नियन्त्रणका लागि ट्रेसिङ र टेस्टिङ कार्यमा सहजीकरण गर्न भन्दै सरकारले स्थानीय निकायमा खटाउने गरी टोली गठन गरेको छ ।
स्वास्थ्य तथा जनसंख्या मन्त्रालयले आयोजना गरेको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले स्थानीय तहमा हुने ट्रेसिङ तथा टेस्टिङ कार्यमा सहजीकरण गर्न तीन सदस्यीय स्वास्थ्यकर्मीको समूह गठन गरिएको बताए । उनले हरेक स्थानीय तहमा खटाउने गरी समूह गठन गरिएको बताए । उक्त समूहमा जनस्वास्थ्य अधिकृत, ल्याब प्रयोगशालाको कर्मचारी, प्यारामेडिक्स वा नर्स एक-एकजना रहनेछन् ।
हरेक गाउँपालिकामा एक समूह, नगरपालिकामा दुई समूह, उपमहानगरपालिकामा तीन समूह र महानगरपालिकामा पाँचवटा समूहका दरले खटाइनेसमेत उनले बताए । प्रवक्ता देवकोटाले समूह बनाउँदा स्थानीय स्वास्थ्यकर्मी एवं जनशक्तिलाई नै प्राथमिकता दिइनेसमेत बताए ।
यस्तै प्रवक्ता देवकोटाले शुक्रबार कोरोना भाइरस संक्रमण भएका कुनै पनि नयाँ बिरामी नथपिएको बताए । उनले प्रदेश १ मा परीक्षणको दायरालाई बढाइए पनि नयाँ संक्रमण फेला नपरेको बताए । यद्यपि उदयपुरबाट ७८ जनाको स्वाब नमुना संकलन गरी कोसी अस्पतालमा पठाइएको उनको भनाइ छ ।
उनका अनुसार प्रदेश २ का आठवटै जिल्लाका २७ स्थानमा १५ सयभन्दा बढी स्वाब नमुना संकलन गर्ने उद्देश्यसहित टोली परिचालन गरिएको छ । टोलीमा स्वास्थ्य सेवा विभाग, नेपाली सेनालगायतका स्वास्थ्यकर्मी र प्रयोगशालाका प्राविधिकको टोली आजै परिचालन गरिएको उनले बताए ।
अहिलेसम्म पिसिआर प्रविधिबाट नाै हजार चार सय सातजनाको परीक्षण भएको छ । यस्तै, आरडिटी विधिबाट ३८ हजार ८९ परीक्षण गरिएको छ । यससँगै कोरोना भाइरस परीक्षण गरिएको कुल संख्या ४७ हजार चार सय ९६ पुगेको प्रवक्ता देवकोटाले बताए । पछिल्लो २४ घन्टामा तीन हजार सात सय ९१ नयाँ परीक्षण भएकोसमेत उनले जानकारी दिए ।
प्रदेश १ मा अहिलेसम्म तीन हजार नाै सय २९, प्रदेश २ मा चार हजार नाै सय ७७, बागमती प्रदेशमा सात हजार एक सय ४३, गण्डकी प्रदेशमा चार हजार सात सय ८३, प्रदेश ५ मा दुई हजार आठ सय ७४, कर्णाली प्रदेशमा चार हजार आठ सय ७० र सुदूरपश्चिम प्रदेशमा नाै हजार पाँच सय १३ परीक्षण भएको प्रवक्ता देवकोटाले बताए । उनले अहिलेसम्म देशभर १२ हजार नाै सय ८५ जना व्यक्ति क्वारेन्टाइनमा रहेको बताए । यस्तै, काठमाडौं उपत्यकामा तीन र उपत्यकाबाहिर ८६ गरी ८९ जना आइसोलेसनमा रहेकोसमेत उनले बताए ।
अहिलेसम्म कुल संक्रमित ४८ जना छन् भने १० जना निको भएर घर फर्किसकेका छन् ।