सुरुङमा क्षति छैन, ‘नट बोल्ट स्लिप’ हुँदा ढाेका खुल्याे
काठमाडौं, साउन १ गते । मेलम्ची खानेपानी आयोजनाको सुरुङ परीक्षणका क्रममा भएको दुर्घटना बरे छानविन गर्न गठित टोलीले सुरुङको ढोका बन्द गर्न लगाइएको नटबोल्टमा समस्या आएका कारण सो दुर्घटना भएको प्रारम्भिक जानकारी पाइएको जनाएको छ ।
खानेपानी मन्त्रालयका सहसचिव रमाकान्त दवाडीको समयोजकत्वमा गठित विज्ञहरु सहितको समितिले आजैबाट स्थलगत अध्ययन सुरु गरेको छ ।
सात दिन भित्र प्रतिवेदन दिन गठित समितिका संयोजक दवाडीले भन्नुभयो, हामीले ठूलै क्षति भएको छ कि भन्ने सोचेका थियौं तर सो घटनामा सुरुङमा कुनै क्षति भएको पाइएन ।
उहाँले भन्नुभया,े “मेलम्चीको मुख्य सुरुङ पछि कुनै मर्मत गर्नु परेमा गाडीसमेत जान सक्ने गरी बनाइएको एक्सेस सुरुङको घरको एक पल्ला भएको ढोका जस्तै फलामको खापा रहेको र एकातर्फ कब्जाहरु रहेको अर्का तर्फ ३० वटा नटबोल्टले टाइट गरिएको रहेछ । त्यसमा पानीको प्रेसरले बोल्टहरु स्लिप भएर ढोका खुलेको देखियो । ढोकाको पल्ला पनि जस्ताको तस्तै छ । खाली नटले काम नगरेको पाइयो ।”
उहाँको टोलीले स्थागल अध्ययन गर्नुका साथै डिजाइनहरु पनि जाँच गरी प्रतिवेदन तयार पार्ने छ । सो सुरुङको ढोका भारतीय कम्पनीले निर्माण गरेको र त्यसलाई डेनिस कम्पनीले पास गरेको थियो । परीक्षणका क्रममा मंगलबार सुरुङको १७ नम्बर ढोका एक्कासि खुल्दा पानीले बगाएर दुई जना घाइते हुनु भएको थियो भने एक जनाको मृत्यु भएको छ र अर्का एक जना अझै बेपत्ता हुनुहुन्छ ।