स्वास्थ्य तालिम कार्यक्रम खारेज गरेकोप्रति प्राविधिक शिक्षालय महासंघको आपत्ति
काठमाडौँ, भदौ १३ गते । सरकारले प्राविधिक शिक्षा तथा व्यावसायिक तालिम परिषद् (सिटिइभिटी)को सम्बन्धनमा सञ्चालित १८ महिने स्वास्थ्य तालिम कार्यक्रमहरू खारेज गरेकोप्रति निजी प्राविधिक शिक्षालय महासंघले आपत्ति जनाएको छ ।
महासंघले २५ वर्षदेखि अविच्छिन्न सञ्चालित कार्यक्रमहरू हठात् र षडयन्त्रपूर्वक खारेज गरेको भन्दै सरकारको ध्यानाकर्षण गराएको हो । सरकारले सिटिइभिटीअन्तर्गत सञ्चालित सिएमए, एएनएम, ल्याब एसिस्टेन्ट र आयुर्वेदलगायत टिएसएसली र एसइईस्तरका १८ महिने स्वास्थ्य तालिम कार्यक्रमहरू चालू शैक्षिक सत्रहरूबाट सञ्चालन नगर्ने निर्णय गरेको थियो ।
महासंघका महासचिव दुर्गाप्रसाद भुसालले विज्ञप्ति जारी गर्दै चिकित्सा शिक्षा आयोगका नाउँमा कार्यक्रमहरू खारेज हुनु गलत भएको भन्दै ध्यानाकर्षण गराएका छन् । ‘सरोकारवालाहरूसँग कुनै पनि छलफल नगरी भावना, योजना र विकल्पसमेत नदिई अन्यायपूर्ण तवरले आकस्मिक रूपमा बन्द गर्ने निर्णयप्रति हाम्रो आपत्ति छ,’ विज्ञप्तिमा उल्लेख छ ।
महासंघका अनुसार मुलुकभर स्वास्थ्य शिक्षामा तालिमरत १२ हजार प्रशिक्षार्थीमा समेत आतंक सिर्जना भएको महासंघले जनाएको छ । निजी प्राविधिक शिक्षालयहरूले वार्षिक रूपमा पाँच करोडबराबर राजस्व सरकारलाई बुझाउने गरेको विज्ञप्तिमा उल्लेख छ ।
सरकारले निजी सञ्चालकहरूको दश अर्बबराबरको लगानी, सिटिइभिटीमा ५० करोड रुपैयाँबराबरको नगद धरौटी तथा प्रत्यक्ष रूपमा पाँच हजारजनाको रोजगारी रहेको वर्तमान अवस्थामा यथोचित मूल्यांकन गरी निर्णयमा पुनर्विचार र मूल्यांकन गर्न महासंघले आग्रह गरेको छ ।