प्रथम नौलिन स्पोर्टस भिल्ला टेनिसको उपाधी महत र श्रेष्ठको जोडीलाई
काठमाडौं, पुस १६ गते । २०२० फन डबल्स लन टेनिस प्रतियोगितामाको उपाधी शैलेस महत र सन्दिप श्रेष्ठको जोडीले जितेको छ । नौलिन स्पोर्ट भिल्लाले काठमाण्डौ सुन्दरबस्ती स्थित आफ्नै कोर्टमा आयोजना गरेको प्रतियोगिताको उपाधी शैलेस महत र सन्दिप श्रेष्ठको जोडीले जितेको हो ।
महत र श्रेष्ठको जोडीले सुमित मैनाली र अल्ताफ रेहमदको जोडीलाई ६–४ र ६–२ को सोझो सेटमा परास्त गर्दै प्रतियोगिताको उपाधी कब्जा गरेका हुन् । जितसँगै महत र श्रेष्ठकोे जोडीले गोल्डेन ट्रफी प्राप्त गरेका छन् भने मैनाली र रेहमदको जोडीले सिल्भर ट्रफीमा चित्त बुझाएका छन् ।
मैनाली र रेहमदको जोडीले सेमिफईनलमा प्रतापजङ्ग पाण्डे र बिज्ञान शेर्पाको जोडीलाई हराउँदै फाईनल प्रवेश गरेको थियो । मैनाली र रेहमदको जोडीले पाण्डे र शेर्पाको जोडीलाई ७–५ र ६–४ को सोझो सेटमा पराजित गरेको थियो ।
यस्तै उपाधी बिजेता महत र श्रेष्ठकोे टिमले दुर्गा केसी र विपिन श्रेष्ठको जोडीलाई हराउँदै फाईनल प्रवेश गरेको थियो । सेमिफईनलमा महत र श्रेष्ठकोे टिमले दुर्गा केसी र विपिन श्रेष्ठको जोडीलाई ६–३ र ६–२ को सोझो सेटमा पराजित गरेको थियो ।
कुल २२ टिमहरुको सहभागिता रहेको प्रतियोगितामा १४ बर्ष माथिका एम्याच्वेर खेलाडीहरुको सहभागिता रहेको थियो ।
प्रारम्भिक चरणका खेलहरुमा एक सेट मात्र खेलाईएको प्रतियोगिताको सेमिफाईनल र फाईनल भने बेस्ट अफ ३ को आधारमा खेलाईएको थियो ।
नौलिन स्पोर्ट भिल्लाले बर्षको सुखद अन्य गर्न र आपसी मेलमिलाप र भाईचाराको सम्वन्ध विस्तारका लागी प्रतियोगिता आयोजना गरेको बताएको छ ।