वैदेशिक रोजगारीबाट फर्केर स्वदेशमा उद्यम गरेका नौ उत्कृष्ट उद्यमी पुरस्कृत

काठमाडौँ, वैशाख १६ गते । सरकारले वैदेशिक रोजगारीबाट फर्केर स्वदेशमा उद्यम गरी रोजगारी सिर्जना गर्ने उद्यमीलाई पुरस्कृत गरेको छ । श्रम, रोजगार तथा सामाजिक सुरक्षा मन्त्रालयले आज भर्चुअल कार्यक्रम गरी नौ उत्कृष्ट उद्यमीलाई पुरस्कृत गरेको हो ।

रु एक लाख राशिको उत्कृष्ट उद्यमी राष्ट्रिय पुरस्कारबाट रुपन्देहीका शिव पराजुली पुरस्कृत हुनुभयो । बाह् वर्ष कतार बसेर स्वदेश फर्कनुभएका उहाँले रुपन्देहीमा सूर्या इन्डष्ट्रिज स्थापना गरी ६० भन्दा बढीलाई प्रत्यक्ष रोजगारी दिनुभएको छ । उहाँले पित्तलको धारा उत्पादन गर्दै आउनुभएको छ । रु ५० हजार राशिको उद्यमी राष्ट्रिय पुरस्कारबाट सोही जिल्लाका भुदुरप्रसाद थारु, मोरङका सनोजकुमार माझी, कास्कीका भोजराज पुवाली, सुनसरीका धनबहादुर राई र शम्भुराज राई, नवलपरासीका गोविन्दनन्द महतो, चुरामणि चौधरी र ज्ञानेन्द्र सम्बाहाम्फे पुरस्कृत हुनुभएको छ ।

थारुले फर्निचर उद्योग सञ्चालन गरी आठ जनालाई प्रत्यक्ष रोजगारी दिनुभएको छ । यस्तै माझीले कृषि फर्म सञ्चालन गरी ६ जनालाई रोजगारी दिनुभएको छ । उहाँले फर्ममा रु ४० लाख बढी लगानी गर्नुभएको छ । पुवालीले पशुपालन, तरकारी र मौरीपालन, धनबहादुर र शम्भुराजले संयुक्तरुपमा पशुपालन तथा तरकारीखेती, महतोले सिमेन्ट सामग्री उद्योग, चौधरीले माछापालन व्यवसाय र सम्बाहाम्फेले कृषि व्यवसाय गर्नुभएको छ । पुरस्कार रकम सम्बन्धितको बैंक खातामा हस्तान्तरण गरिने मन्त्रालयले जनाएको छ ।

कार्यक्रममा श्रम, रोजगार तथा सामाजिक सुरक्षामन्त्री गौरीशङ्कर चौधरीले सरकारले बाध्यकारी वैदेशिक रोजगारी अन्त्य गर्ने लक्ष्य लिएको उल्लेख गर्दै स्वदेशमै रोजगारी सिर्जना र स्वरोजगारको वातावरण बनाउन सरकार लागिपरेको बताउनुभयो । बेरोजगारी समस्या हल गर्न विभिन्न सीपमूलक तालिम सञ्चालन गरिएको बताउनुभयो । उहाँले वैदेशिक रोजगारीबाट फर्केर स्वदेशमै उद्यम सञ्चालन गरी रोजगारी सिर्जना गरेको भन्दै पुरस्कृतप्रति आभार व्यक्त गर्नुभयो ।

मन्त्रालयका सहसचिव सुमन घिमिरेले वैदेशिक रोजगारीबाट फर्केर नेपालमै पेशा व्यवसाय गर्नेलाई प्रोत्साहित गर्न पुरस्कृत गरिएको बताउनुभयो । वैदेशिक रोजगारीका क्रममा सिकेका सीप र आर्जित पूँजीको प्रयोग गरी स्वदेशमै विभिन्न उद्यम गरेकामध्ये नौ जनालाई पुरस्कृत गरिएको उहाँको भनाइ छ ।

उत्कृष्ट उद्यमी राष्ट्रिय उद्यमी पुरस्कारबाट पुरस्कृत पराजुलीले आफूले दक्ष कालीगढको समस्या भोग्दै आएको र सरकारबाट कुनै सहयोग नपाएको गुनासो गर्नुभयो । पुरस्कृत व्यक्तित्व पुवालीले कृषि तथा पशुफर्मको सञ्चालक, आफ्नै देशमा केही गर्नुपर्छ भन्ने सोचबाट आफू स्वदेश फर्किएको बताउनुभयो । नेपालको समृद्धि कृषि क्षेत्रबाट मात्र सम्भव हुने भन्दै उहाँले कृषिमा आत्मनिर्भर हुन सरकारले सहयोग गर्नुपर्ने बताउनुभयो । अर्का पुरस्कृत व्यक्तित्व ज्ञानेन्द्र सम्बाहाम्फेले दैनिक उपभोग्य कृषिजन्य सामग्रीमा परनिर्भर हुनुपरेको यथार्थलाई परिवर्तन गर्न आफू कृषिमा लागिपरेको बताउनुभयो ।

विदेशमा काम गरी फर्केका उद्यमी राष्ट्रिय सम्मान तथा पुरस्कार व्यवस्थापन कार्यविधि, २०७६ बमोजिम उनीहरुलाई छनोट गरिएको मन्त्रालयले जनाएको छ । पुरस्कारका लागि ८५ वटा आवेदन प्राप्त भएका थिए । कार्यविधिमा भएको विभिन्न सात वटा छनोटका आधारमा पुरस्कृत उद्यमीको छनोट गरिएको मन्त्रालयका सहप्रवक्ता देवेन्द्र कार्कीले जानकारी दिनुभयो ।

रोजगारी सिर्जना, पूँजी लगानी, स्थानीय स्रोत र प्रविधिको प्रयोग, उत्पादन निर्यात गरेको अवस्था सामाजिक दायित्व वहन, वातावरणमैत्री प्रयोग तथा प्रदूषण व्यवस्थापन, उद्योग सञ्चालन गरेको भौगोलिक क्षेत्रका आधारमा उनीहरुलाई छनौट गरिएको उहाँले बताउनुभयो । रासस

Related News

Leave a Reply

टाइप गरेर स्पेस थिच्नुहोस् र नेपाली युनिकोडमा पाउनुहोस। (Press Ctrl+g to toggle between English and Nepali OR just Click on the letter). अंग्रेजीमा टाइप गर्न "अ" मा थिच्नुहोस्।

*

TOP NEWSview all

Kami Rita scales Everest 25 times; Tourism Ministry appeals not to disseminate fake information

Humla section of Karnali Corridor built in timeframe

Nepal’s Kushal Bhurtel nominated for ICC Men’s Player of the month award

Nepal climbs a notch up in T-20 ranking and ranked 13th

US pledges $8.5 million to Nepal to fight against COVID-19 pandemic




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana Chairperson : Mr. Kishore Thapa


Counter:
Web Counter