२४ घण्टामा ५४८ सङ्क्रमित थप, तीनको मृत्यु
February 16, 2022 | 8:53 pm
काठमाडौं, फागुन ४ गते । पछिल्लो २४ घण्टामा ५४८ जनामा कोरोना सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार छ हजार ७८२ जनाको पीसीआर परीक्षण गर्दा ५४८ जनामा सङ्क्रमण पुष्टि भएको हो ।
सोही अवधिमा दुई हजार ९७४ जनाको एन्टीजेन परीक्षण गर्दा १८५ जनामा सङ्क्रमण पुष्टि भएको छ ।
मन्त्रालयका अनुसार कुल नौ हजार ७५६ जनामा परीक्षण गर्दा पीसीआर र एन्टीजेन गरेर ६३९ जनामा सङ्क्रमण पुष्टि भएको छ । सोही अवधिमा १६ सय जना सङ्क्रमणमुक्त भएका छन् ।
मन्त्रालयका अनुसार २४ घण्टामा तीन जनाको मृत्यु भएको छ । योसँगै मुलुकमा कोरोनाबाट मृत्यु हुनेको सङ्ख्या ११ हजार ९०५ पुगेको छ ।
पछिल्लो २४ घण्टामा मुलुकमा दुई लाख १४ हजार १०३ जनाले कोरोनाविरुद्धको खोप लगाएका छन् । त्यस्तै, नेपालमा हाल १८ हजार २५१ जना सक्रिय सङ्क्रमित छन् ।