कृषकलाई छ करोड अनुदान हस्तान्तरण
चितवन, जेठ २७ गते । भरतपुर महानगरपालिकाले दुग्ध कृषकहरूलाई छ करोड १२ लाख रुपियाँ अनुदान हस्तान्तरण गरेको छ । आर्थिक वर्ष २०७९/८० मा कृषकले सहकारीमार्फत बिक्री गरेको प्रतिलिटर तीन रुपियाँका दरले हुन आउने छ करोड १२ लाख रुपियाँ अनुदान हस्तान्तरण गरेको हो ।
महानगर प्रमुख रेनु दाहाल, उपप्रमुख चित्रसेन अधिकारी र प्रमुख प्रशासकीय अधिकृत नरेन्द्र कुमार रानाले कृषकलाई संयुक्त रूपमा उक्त रकम बराबरको चेक हस्तान्तरण गर्नुभएको हो । आर्थिक वर्ष २०७९/८० दुग्ध सहकारीमा आबद्ध
कृषकहरूले दुई करोड चार लाख लिटर दुध सङ्कलन गरेको तथ्याङ्कका आधारमा महानगरले उक्त अनुदान प्रदान गरेको हो ।
आर्थिक वर्ष २०७४/७५ बाट भरतपुर महानगरपालिकाले नेपालमै पहिलो पटक
पशुपालक कृषकलाई दृष्टिगत गरी अनुदान दिन सुरु गरेको थियो । महानगर प्रमुख रेनु दाहाल कृषकलाई प्रोत्साहनका लागि उक्त अनुदान दिने गरिएको बताउनुभयो । दुधमा अनुदानसँगै महानगरले कृषकहरूलाई लक्षित गरी पशु स्वास्थ्य घरदैलो उपचार, गोठ सुधार, पशु खरिदमा अनुदान, बाख्रा, बङ्गुर तथा हाँस वितरण पनि गरेको छ ।
यस्तै विभिन्न यन्त्र उपकरण, प्राविधिक तालिम, मिल्किङ मेसिन, काउ म्याटलगायतका सामग्री पनि महानगरले बेलाबखत दिँदै आएको छ । त्यस्तै व्यावसायिक कृषिका लागि कृषिमा यान्त्रीकीकरण महानगरले आफ्नो वार्षिक बजेटमा व्यवस्था गर्दै आएको छ । पछिल्लो समय महानगरले कृषिमा दिन थालेको अनुदान र यान्त्रीकीकरणको अभियानले कृषिमा युवा आकर्षण वृद्धि भएको बताउनुहुन्छ, महानगर उपप्रमुख चित्रसेन अधिकारी । महानगरले सुरु गरेको अनुदानबाट महानगर क्षेत्रका कृषक उत्साहित छन् । त्यस्तै उत्साहितमध्ये एक हुनुहुन्छ भरतपुर ६ का कृषक ऋषि चापागाईं । अन्नपूर्ण दुग्ध उत्पादक सहकारी संस्थाका अध्यक्षसमेत रहनुभएका चापागाईं महानगरले दुग्ध उत्पादकलाई लक्षित गरी जुन प्रकारको अनुदान दिएको छ यसले निर्वाहमुखी पशुपालनबाट कृषकलाई व्यावसायिक बनाउन मद्दत पु¥याएको छ ।