च्याउ खेतीको आकर्षण : लगानी थोरै, आम्दानी धेरै
मीना कंडेल / कावासोती, भदौ १२ गते । पूर्वी नवलपरासीमा व्यावसायिक च्याउ खेतीतर्फ कृषकको आकर्षण बढ्दो छ । च्याउ खेती गर्ने कृषक मेहनत गरेमा आफ्नै ठाउँमा मनग्य आम्दानी गर्न सकिन्छ भन्ने उदाहरण बन्नेगरेका छन् ।
कावासोती नगरपालिका–८ मा रहेको ठकुरी सेन एग्रोफार्मका सञ्चालक ६० वर्षीय टीकाप्रताप सेन ठकुरी विगत तीन वर्षदेखि च्याउखेतीमा नै रमाइरहनु भएको छ । उहाँको दैनिकी च्याउ विक्री वितरणमा बित्नेगरेको छ ।
हरेक दिन बिहान च्याउ प्याकेजिङमै समय बिताउने ठकुरीले पहिले समयको सदुपयोगका लागि मात्रै घरमै च्याउ खेती सुरु गर्नुभएको थियो । तर अहिले भने व्यावसायिक रूपमै च्याउको खेती सुरु गर्नुभएको हो । “केही गर्छु भन्ने इच्छाशक्ति भयो भने न त पैसाले रोक्दो रहेछ, न त उमेरले नै छेक्दो रहेछ । मात्र काम गर्ने जोस, जाँगर चाहिँदो रहेछ” टीकाप्रतापले भन्नुभयो ।
केही गर्छु भन्ने इच्छाशक्ति भयो भने न त पैसाले रोक्दो रहेछ, न त उमेरले नै छेक्दो रहेछ ।
स्थानीयस्तरमै च्याउखेती गरेर स्थानीय उपभोक्तालाई ताजा च्याउ उपभोग गराउने उद्देश्यले नै च्याउ खेती गरेको ठकुरीले बताउनुभयो । तीन वर्षअघि २२ लाख रुपियाँको लगानीमा च्याउखेती सुरु गरेर उहाँले राम्रो आम्दानी गरिरहनु भएको छ । उहाँले कन्ये च्याउ होलसेलमा प्रतिकेजी दुईसय रुपियाँमा बेच्ने गर्नुभएको छ ।
कन्ये च्याउ नवलपुरमा नै खपत हुनेगरेको छ । उहाँको कृषिफार्ममा च्याउ लगाउन १० वटा टनेल छन् । एउटै टनेलबाट उत्पादित च्याउबाट पहिलो लटमै दुई लाख रुपियाँसम्म आम्दानी हुनेगरेको उहाँको भनाइ छ । च्याउ फार्ममा उहाँले दुई जनालाई रोजगारी दिनुभएको छ ।
ती दुई जना कामदारले च्याउ उमार्नका लागि प्याकिङको काम गर्नुहुन्छ भने अन्य पाँच जनाले सहयोग गर्नुहुन्छ । यस्तै गैँडाकोट–१ मा अनिता च्याउ फार्मको नाममा अनिता न्यौपानेले च्याउखेती गर्दै आइरहनुभएको छ । सुरुमा च्याउखेती गर्न निकै गाह्रो महसुस भएको अनुभव उहाँले सुनाउनुभयो ।
अनुभव बटुल्दै जाँदा अहिले यही नै आम्दानीको स्रोत बनेको उहाँले बताउनुभयो । “श्रीमान् कोरोनाका कारण कतारबाट घर फर्किएपछि च्याउ खेती सुरु गरेको हो, सुरुमा त बिग्रियो, घाटा पनि लाग्यो पछि राम्रो हुँदै आयो” उहाँले भन्नुभयो ।