बदाम उत्पादन गर्ने कृषकलाई प्रोत्साहन रकम
राजकुमार भट्टराई / खोटाङ, कात्तिक ६ गते । पाँच मुरी बदाम फलाउने कृषकलाई खोटाङको हलेसी तुवाचुङ नगरपालिकाले प्रोत्साहन रकम दिने भएको छ । कृषकलाई बदाम उत्पादनमा अझै हौसला मिलोस् भनेर नगरपालिकाले उत्पादनमा आधारित प्रोत्साहन रकम दिन लागेको हो ।
उत्पादनको आधारमा प्रोत्साहन अनुदान रकम प्रदान गर्ने निर्णय गरिएको मेयर विमला राईले बताउनुभयो । हलेसी तुवाचुङ नगरपालिका अत्याधुनिक बदाम उत्पादन हुने क्षेत्र हो । उत्पादनमा आधारित प्रोत्साहन रकम लिनलाई नगरपालिकाले कात्तिक ५ गते सूचना जारी गरेको छ ।
पाँच मुरीभन्दा धेरै बदाम फलाउने कृषकले १५ दिनभित्र आफ्नो वडा कार्यालयमा निवेदन दिन सक्ने नगरपालिकाले जनाएको छ । पाँच मुरी बदाम फलाउने कृषकले एक मुरीको ५ सयका दरले २५ सय प्रोत्साहन रकम पाउने छन् ।
पाँच मुरीभन्दा बढी फलाउने कृषकले ५ मुरीसम्म ५ सयका दरले र पाँच मुरीभन्दा बढीको तीनसयका दरले प्रोत्साहन रकम पाउने मेयर राईले बताउनुभयो । हलेसी तुवाचुङ नगरपालिकामा यो वर्ष करिब सातसय मुरी बदाम उत्पादन हुने आङ्कलन गरिएको छ । करिब दुईसय घरधुरीले पाँच मुरीभन्दा बढी बदाम उत्पादन गर्दैआएका छन् ।
हलेसी तुवाचुङ नगरपालिकाको वडा २ डिकुवा, वडा ३ च्यास्मिटार, वडा ५ दुर्छिम, वडा ७ महादेवस्थान, वडा ८ धितुङ र वडा ११ राजापानीमा बदाम खेती हुँदैआएको छ । सो ठाउँमा उत्पादित बदाम जिल्लाका सबै ठाउँ र जिल्ला बाहिर छिमेकी जिल्लाका बजारमा पुग्ने गरेको छ । बदाम प्रवर्धनका लागि नगरपालिकाले उत्पादनमा आधारित रकम प्रदान गर्न लागेको मेयर राईले बताउनुभयो ।