संघ र प्रदेशमा मन्त्रालयको संख्या घटाउनुपर्छः गगन थापा


पोखरा, पुस २० गते । नेपाली कांग्रेसका महामन्त्री गगनकुमार थापाले सरकारको आकार ठूलो भएको बताएका छन् । शनिबार पोखरामा आयोजित कांग्रेसबाट निर्वाचित जनप्रतिनिधि र पार्टीका सभापतिहरुको प्रशिक्षण कार्यक्रममा उनले संविधान संशोधन गरेर संघ र प्रदेशमा मन्त्रालयको संख्या घटाउनुपर्ने र चुस्त मन्त्रालय चलाउनुपर्ने बताएका हुन् ।

‘सरकारको साइज ठूलो भयो । यत्रो सरकार चाहिँदैन, यति धेरै चाहिँदैन । प्रदेशमा ४–५ कतिजना मन्त्री बनाउने हो संविधानमा बाँध्नुपर्छ । संविधानमा २५ जना मन्त्री नलेखेको भए केन्द्रमा ५० जना मन्त्री बनाउनुपथ्र्यो,’ उनले भने, ‘पार्टी र गुट मिलाउँदा मिलाउँदा समस्या हुन्छ । गुट मिलेन भने मन्त्रालय तोड्दे भन्छ । त्यसैले संविधानबाटै मन्त्रालयको संख्या व्यवस्थित गर्नुपर्छ ।’

केन्द्रमा पनि ७–८ मन्त्रालय मात्रै भए पुग्ने उनको तर्क छ । ‘केन्द्रमा यतिधेरै मन्त्रालय चाहिँदैन । ७–८ वटा मन्त्रालय राखे हुन्छ । प्रदेशमा यत्रो ठूलो चाहिँदैन । यसको संख्या घटाउनुपर्छ,’ उनले भने, ‘सानो तर प्रभावकारी मन्त्रालय बनाउन संविधानमा काम गर्छौं । अहिले काँग्रेसमा छलफल गरेका छौं । एमालेसँग मिलेर सानो संयन्त्र बनाएका छौं । त्यहाँ छलफल गर्छौं । अनि माओवादी र संसदमा भएका सबै दलहरुसँग छलफल गर्छौं । अनि नागरिकसम्म पुगेर छलफल चलाउछौं ।’

माथिल्ला सरकारले साना आकारको बजेट छुट्याएर त्यसको भारी प्रदेश र स्थानीय सरकारलाई बोकाइएको थापाले बताए ।

उनले लोकप्रिय पार्टीले पाँचै वर्ष सरकार चलाउने गरी संविधान संशोधन गर्न लागिएको बताएका छन् । ‘आम नागरिक यसले सरकार चलाओस् भन्ने चाहन्छन् । मतबाट अभिव्यक्त पनि गर्छन् । तर निर्वाचन प्रणाली यस्तो बनाइएको छ कि त्यो राजनीतिक दलले ५ वर्ष सरकार चलाउन पाउँदैन,’ उनले भने, ‘सरकार चलाउन नपाउने भैसकेपछि अर्को पार्टीसँग मिलेर चलाउनुपर्छ । भारत, युरोपका कतिपय देशमा १५ वर्ष, २० वर्ष गठबन्धन सरकार चल्छ, नचल्ने होइन । तर हाम्रोमा गठबन्धन फिट भएन । जुन पार्टीले लोकप्रिय मत प्राप्त गर्छ त्यसले ५ वर्ष सरकार चलाउन पाउनुपर्छ ।’

उनले कांग्रेसले जितेका पालिकाहरुलाई आगामी निर्वाचनमा संकल्प र घोषणपत्र नभई उपलब्धी पत्र लिएर जाने अवस्था बनाउन निर्देशन दिए ।

Related News

Comments are closed

TOP NEWSview all

Four-nation championship: Nepal into the final

KMC installs Pelican crossings at 36 key locations

Japan to recruit 20,000 Nepali caregivers for health sector

Mushroom industry opened in Nawalparasi

UML reminds PM to revise provisions of Cooperative Ordinance




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana

Chairperson : Mr. Kishore Thapa


Counter:
Web Counter